काठमाडौं । चितवनको माडीमा नेपालमै पहिलो पटक सालक संरक्षणसम्बन्धी राष्ट्रिय सम्मेलन सुरू भएको छ । बागमती प्रदेश वन तथा वातावरण मन्त्रालयको आयोजनामा तथा डिभिजन वन कार्यालय चितवनको संयोजनमा सोमबार बिहानदेखि सम्मेलन सुरू भएको हो । सालक सम्मेलनको उद्घाटन बागमती प्रदेशका वन तथा वातावरणमन्त्री भरत केसीले गर्नुभयो । सम्मेलनमा बागमती प्रदेश अन्तर्गतका डिभिजन वन कार्यालय प्रमुखहरू, राष्ट्रिय निकुञ्ज तथा वन्यजन्तु संरक्षण विभाग, चितवन राष्ट्रिय निकुञ्ज, जिल्लाका सामुदायिक वनका प्रतिनिधि तथा संरक्षण क्षेत्रमा क्रियाशील विज्ञ र अभियन्ताहरूको सहभागिता रहेको छ ।
डिभिजन वन कार्यालय चितवनका प्रमुख विष्णुप्रसाद आचार्यका अनुसार सम्मेलनमा संरक्षित वन्यजन्तु सालकको वर्तमान अवस्था, यसको संरक्षण आवश्यकताका कारण, संरक्षणमा देखिएका चुनौती तथा भावी रणनीतिका विषयमा विस्तृत छलफल भइरहेको छ । संरक्षणमा हातेमालो गर्दै आएका विभिन्न सङ्घ–संस्था, विज्ञ र सरोकारवालासहित २०० भन्दा बढी सहभागीको उपस्थितिमा सम्मेलन आयोजना गरिएको हो । सम्मेलनका क्रममा सालक संरक्षणका लागि आवश्यक नीति, कार्ययोजना र दीर्घकालीन दृष्टिकोणबारे छलफल गरिने बताइएको छ । छलफलपछि सालक संरक्षणसम्बन्धी ‘माडी घोषणापत्र’ जारी गर्दै सम्मेलन सम्पन्न गरिनेछ ।
सालक लोपोन्मुख वन्यजन्तुका रूपमा सूचीकृत छ । यो जनावर नेपाल, भारत, चीनलगायत दक्षिण एसियाली देशहरू तथा अफ्रिकाका केही उष्ण भूभागमा पाइन्छ । अत्यन्त लजालु, संवेदनशील र शान्त वातावरण मन पराउने सालक मानिसका लागि हानिकारक हुँदैन । बरु धमिरा र कमिला खाएर खेतीबाली जोगाउने भएकाले सालकलाई किसानको साथीका रूपमा पनि चिनिन्छ ।
