काठमाडौं । पशुपति क्षेत्र विकास कोषका तत्कालीन सदस्य सचिव डा. मिलनकुमार थापासहित १४ जनाविरुद्ध दायर गरिएको भ्रष्टाचार मुद्दाको सुनुवाइका लागि पेसी तोकिएको छ। मुद्दाको सुनुवाइ विशेष अदालतका न्यायाधीशत्रय नारायणप्रसाद पौडेल, उमेश कोइराला र विदुर कोइरालाको इजलासमा हुँदैछ। पशुपति क्षेत्रमा शवदाह मेसिन खरिद प्रक्रियामा अनियमितता गरेको आरोपमा उक्त मुद्दा दायर गरिएको हो। अभियोगअनुसार भारतीय रुपैयाँ ३२ लाख ५० हजार मूल्य पर्ने शवदाह मेसिनलाई नेपाली रुपैयाँ १ करोड ५२ लाख बराबरको देखाई, प्रचलित कानुनले दिएको छुटसमेत लागत अनुमानमा समावेश गरी अस्वाभाविक रूपमा उच्च लागत अनुमान तयार गरिएको थियो।
यस प्रकरणमा डा. थापासहित तत्कालीन निमित्त सदस्य सचिव राजुकुमार खत्री, तत्कालीन कार्यकारी निर्देशक घनश्याम खतिवडा, हालका उपनिर्देशक रेवतीरमण अधिकारी, तत्कालीन निमित्त उपनिर्देशक सिताराम रिसेल तथा इन्जिनियरहरू पशुपति ठाकुर, डेनिस उप्रेती र रमेश पुरीलाई प्रतिवादी बनाइएको छ। त्यसैगरी लेखा अधिकृत चन्द्रप्रसाद खनाल, पुल्चोक क्याम्पसको इलेक्ट्रिकल विभागका प्रमुख उपप्राध्यापक युवराज अधिकारी, कोषका कानुनी सल्लाहकार तथा मूल्याङ्कन समिति सदस्य लैनबहादुर थापा, सप्लायर्स कम्पनी म्याप इन्टरप्रिनियर्सका सञ्चालकद्वय मनोज पुरी र यदुनन्दन भट्टराई तथा एप्पल इन्जिनियरिङका प्रबन्ध निर्देशक सुरज चापागाईँलाई पनि प्रतिवादी बनाइएको छ।
अख्तियारले प्रतिवादीहरूसँग जनही एक करोड ८२ लाख रुपैयाँ बिगो मागदाबी गरेको छ। उक्त मुद्दाको सुनुवाइबाट प्रकरणको वास्तविकता र कानुनी जिम्मेवारी निर्धारण हुने अपेक्षा गरिएको छ।
