काठमाडौं । पश्चिम बागलुङको ढोरपाटन नगरपालिकामा दादुरा सङ्क्रमितको सङ्ख्या २०५ पुगेको छ । गत फागुन पहिलो सातादेखि फैलिएको सङ्क्रमण अझै पूर्णरूपमा नियन्त्रणमा आउन सकेको छैन । ढोरपाटन नगरपालिका–७, बोबाङ, वडा नं. ८ सेराबाङ र वडा नं. ९ लाकुरीबोटमा सङ्क्रमण तीव्र रूपमा फैलिएपछि बुर्तिबाङ प्राथमिक स्वास्थ्य केन्द्रर बोबाङ स्वास्थ्य चौकीमा आइसोलेसन कक्ष बनाएर बिरामीको उपचार भइरहेको छ । नगरपालिकाका स्वास्थ्य शाखा प्रमुख भुमिश्वर शर्माका अनुसार सङ्क्रमितमध्ये १११ महिला र ९४ पुरुष छन् । उपचारमा आएका अधिकांश बिरामी निको भएर घर फर्किसकेका छन् भने हाल ११ जना उपचाररत छन् । राष्ट्रिय जनस्वास्थ्य प्रयोगशाला काठमाडौँमा गरिएको परीक्षणमा १३ जनामा दादुरा पुष्टि भएपछि पालिकाले सङ्क्रमण फैलिन नदिन खोप अभियान सञ्चालन गरेको थियो । ढोरपाटनसँगै छिमेकी निसीखोला, बडिगाड र तमानखोला गाउँपालिकामा पनि सङ्क्रमित भेटिएपछि ती पालिकाले सतर्कता बढाएका छन् । तमानखोला गाउँपालिकाका स्वास्थ्य शाखा संयोजक तिलबहादुर छन्त्यालले जोखिम कायमै रहेकाले विद्यालय र घरदैलोमा पुगेर सचेतना कार्यक्रम सञ्चालन भइरहेको जानकारी दिनुभयो ।
सङ्क्रमणको अवस्था जटिल बन्दै गएपछि सङ्घीय र प्रदेश स्वास्थ्य मन्त्रालयका साथै विश्व स्वास्थ्य सङ्गठन (डब्लुएचओ) को टोलीले पनि प्रभावित क्षेत्रमा पुगेर उपचार र अनुसन्धानमा सहयोग गरेको छ । स्वास्थ्य कार्यालय बागलुङका सूचना अधिकारी देवप्रकाश घिमिरेका अनुसार हालसम्म ढोरपाटनका १० देखि १९ वर्ष उमेर समूहका पाँच हजार ९१३ जना बालबालिका तथा किशोरकिशोरीलाई दादुरा विरुद्धको खोप लगाइएको छ । बालबालिकामा अत्यधिक ज्वरो आउने र शरीरमा बिबिरा देखिने समस्याका साथै अभिभावकहरूमा पनि रुघाखोकी र ज्वरोको समस्या देखिएकाले विशेष सावधानी अपनाउन स्वास्थ्यकर्मीले आग्रह गरेका छन् । गोरखापत्र
