शम्भु प्रसाद भट्ट, महेन्द्रनगर ३२ असार । कञ्चनपुरको भीमदत्त नगरपालिका १३ स्थित वडा कार्यालयद्धारा सरसफाई कार्यक्रम गरिएको छ । वडाले वडाको महेन्द्रनगर बजार देखि दोधरा चाँदनी झोलुङ्गे पुल जाने सडक खण्डको केही क्षेत्रमा सरसफाई कार्यक्रम गरेको हो । प्रत्येक महिनाको अन्तिम शनिवार वडाले प्रत्येक टोलका टोल समिति तथा स्थानिय नागरिकको प्रत्यक्ष सहभागितामा सरसफाई कार्यक्रम गर्ने गरि सरसफाई कार्यक्रम सुरु गरिएको वडाध्यक्ष राम बहादुर बोहराले जानकारी दिए ।
बोहराका अनुसार झोलुङ्गे पुल सडकखण्ड छेउछाउमा हुर्किएको झारपात, अव्यवस्थित तवरले राखिएको बालुवा, गिट्टी, ढुङ्गा र सडक किनारको फोहरलाई हटाइएको छ । उनका अनुसार उक्त सडकमा सवारी साधनको चाप एकदमै हुने भएकोले दुर्घटनाको जोखिमलाई मध्यनजर गर्दै फोहर सँगै अन्य कुराहरुलाई पनि हटाइएको छ । सरसफाई कार्यक्रममा स्थानिय नागरिक, जनप्रतिनिधि, सुरक्षा कर्मी लगायत विभिन्न सरोकारवाला निकायको उपस्थिती रहेको थियो । आगामी दिनमा पनि वडाले सरसफाई कार्यक्रमलाई निरन्तरता दिने जनाएको छ ।