काठमाडौ । वाफ महिला च्याम्पियनसिपमा स्ट्राइकर सावित्रा भण्डारी ‘साम्बा’ एक्लैले पाँच गोल गरेपछि नेपालले बिहीबार इराकलाई ५–० को फराकिलो अन्तरले हराएको छ । यस जितसँगै नेपालको दुई खेलबाट दुई जित हासिल भएको छ । नेपालले पहिलो खेलमा सिरियालाई ४–१ ले पराजित गरेको थियो । नेपालले समूह चरणको अन्तिम खेलमा शनिबार प्यलोस्टाइनविरुद्ध खेल्ने छ । अर्को समूहमा आयोजक साउदी अरब, ग्वाम, लेबनान र जोर्डन छन् । समूह चरणपछि समूहका शीर्ष दुई टोली सेमिफाइनलमा प्रवेश गर्ने छन् । पश्चिम एसियाका गल्फ राष्ट्रहरूले प्रतिस्पर्धा गर्ने यस प्रतियोगितामा नेपालले आमन्त्रित टोलीका रूपमा सहभागिता जनाएको हो ।
साउदी अरबको रियादस्थित किङ अब्दुल्लाह स्पोर्ट्स सिटी रिजर्व स्टेडियममा भएको खेलको पूर्वार्धमा चार गोल गर्नुभएकी सावित्राले मध्यान्तरपछि एक गोल थप्नुभयो । यससँगै सावित्राको ४४ अन्तर्राष्ट्रिय खेलमा ४९ गोल भएको छ । खेलको १३ औँ मिनेटमा रेखा पौडलको सहयोगमा सावित्राले इराकी गोलकिपरसँगको ‘वन भर्सेज वन’ को स्थितिमा गोल गरी नेपाललाई अग्रता दिलाउनुभएको हो । सावित्राले दुई मिनेटपछि नै इराकी डिफेन्डरबाट बल खोसेर उत्कृष्ट फिनिसिङमार्फत दोस्रो गोल गर्नुभयो । खेलको ३६ औँ मिनेटमा सावित्राले आफ्नो ह्याट्रिक पूरा गर्नुभयो । पूजा रानाको क्रसमा सावित्राले हेडमार्फत तेस्रो गोल गर्नुभएको हो ।
पूर्वार्ध सकिन २ मिनेट बाँकी छँदा सावित्राले रिबाउन्डमा चौथो गोल गरेर इराकको पहुँचबाट खेल निकै टाढा पु¥याउनुभयो । सावित्राले निर्धारित समय सकिन ११ मिनेट बाँकी छँदा अन्तिम गोल गर्नुभएको हो । प्रीति राईको ‘थु्र’ पासमा सावित्राले इराकी गोलकिपरलाई समेत छलाएर पाँचौँ गोल गर्नुभएको हो ।
