काठमाडौं । चुरे क्षेत्रमा मंगलबार राति परेको भारी बर्षाका कारण ढुङग्रे खोलामा आएको बाढीले सडक कटान गर्दा पूर्व–पश्चिम लोकमार्ग रातिदेखि अवरुद्ध भएको छ । बाढीले बर्दीबास ५ स्थित जंगली क्षेत्रमा पर्ने फबेलगाछी पुलको पश्चिमतर्फको अप्रोच कटान गर्दा लोकमार्ग अवरुद्ध भएको हो । बाढीले कटान जारी राखेकाले प्रहरीले पूर्वतर्फको गाडीलाई गौशला रोड र पश्चिमतर्फका सवारीलाई लक्ष्मिनिया चोकबाट हुलाकी सडक हुँदै गन्तव्यतर्फ पठाउने गरेको छ ।
इलाका प्रहरी कार्यालय बर्दीबासका डिएसपी रेवतिरमण पोखरेलका अनुसार बाढीले जंगली क्षेत्रमा सडक कटान गरेको छ । कटान क्षेत्रमा सडक कार्यालयले बिहानदेखि मर्मतको काम सुरु गरेको जनाएको छ । सडक डिभिजन कार्यालय जनकपुरका डिइ दीपककुमार झाले मर्मतको काम भइरहेको बताउनुभयो । बढीले मूल सडकमै १० मिटर लम्बाई र करिव अढाइ मिटर गहिरो खाल्डो पारेकाले अपरान्हपछि मात्र लोकमार्ग खुल्न सक्ने सम्भावना रहेको बताउनुभयो । गोरखापत्र