काठमाडौं । सन् २०२४ को सात महिनामा छ लाख ४७ हजार ६१५ पर्यटक नेपाल भित्रिएका छन् । सन् २०२३ को सोही समयमा पाँच लाख ३४ हजार २०६ पर्यटक नेपाल भित्रिएका थिए । पर्यटन बोर्डले उपलब्ध गराएको तथ्याङ्क अनुसार पछिल्लो सात महिनामा नेपाल भित्रिएका पर्यटकको सङ्ख्या गत वर्षको तुलनामा २१.२२ प्रतिशतले बढी हो । बोर्डका निर्देशक मणिराज लामिछानेले भन्नुभयो, “सन् २०२४ को जुलाईमा ६४ हजार ५९९ पर्यटक नेपाल भित्रिएका छन् । यो सङ्ख्या गत वर्षको जुलाईको तुलनामा ११.९१ प्रतिशतले बढी हो । गत वर्ष ५७ हजार ७२६ जना विदेशी पर्यटक नेपाल आएका थिए । जुलाईमा सार्क राष्ट्रबाट ४२ प्रतिशत, एसियाका अन्य मुलुकबाट १८, युरोपबाट १४, अमेरिकाबाट १३, ओसियानालगायत अन्य मुलुकबाट १२ प्रतिशत पर्यटक नेपाल भित्रिएको उहाँले जानकारी दिनुभयो ।
जुलाईमा नेपाल भित्रिएका पर्यटकको सङ्ख्या सन् २०१९ को तुलनामा भने नौ प्रतिशतले कम देखिएको छ । कोरोना महामारीअघि सन् २०१९ को जुलाईमा ७० हजार ९१६ पर्यटक नेपाल आएका थिए । जुलाईमा नेपाल आउने पर्यटकमध्ये सबैभन्दा बढी भारत, अमेरिका, चीन, बेलायत र बङ्गलादेश रहेका छन् । भारतबाट २१ हजार ४९१, अमेरिकाबाट सात हजार ८१९, चीनबाट छ हजार ८१९, बेलायतबाट तीन हजार ८०६, बङ्गलादेशबाट तीन हजार ४७०, अस्ट्रेलियाबाट एक हजार ९०१, दक्षिण कोरियाबाट एक हजार ५३७, भुटानबाट एक हजार २०७, मलेसियाबाट एक हजार १२५ र जापानबाट एक हजार ११४ पर्यटक नेपाल आएका छन् ।