काठमाडौं । प्रधानमन्त्री केपी शर्मा ओलीले कलाकारले कलाले मात्र नभएर अन्य कार्यमार्फत पनि समाजको समस्या चिन्न सक्नुपर्ने बताउनुभएको छ । प्रधानमन्त्री ओलीले सामाजिक चलचित्र ‘नमेटिने घाउ’ मा शनिबार स्वराङ्कन गर्ने क्रममा सो धारणा व्यक्त गर्नुभएको हो । प्रधानमन्त्री ओलीले चलचित्रको स्वराङ्कनपछि भन्नुभयो, “एसिड पीडितलाई न्याय दिलाउने काममा सरकार तत्परतासाथ लागिपर्छ । अब पीडकले दण्ड पाउने छन् । सरकारले सबैलाई न्याय दिन्छ ।” उहाँले भन्नुभयो, “एसिडपीडितले यति लामो समयसम्म पीडा भोगिरहनुभएको छ, उहाँहरूलाई छिटोभन्दा छिटो न्याय दिनु पर्छ ।” प्रधानमन्त्री ओलीले संसद्बाट तुरुन्तै अध्यादेश ल्याएर भए पनि पीडितलाई न्याय दिनुपर्ने बताउनुभयो । “पीडकलाई सजाय दिने गरी कडाभन्दा कडा कानुनको मसौदा तयार गर्नु जरुरी छ,” प्रधानमन्त्री ओलीले भन्नुभयो ।
प्रधानमन्त्री केपी शर्मा ओलीले रमित ढुङ्गाना निर्देशित चलचित्रमा प्रधानमन्त्रीकै भूमिकामा अभिनय गर्दै हुनुहुन्छ । चलचित्रमा पूर्वप्रधानमन्त्री माधव नेपाल, सांसद ज्ञानेन्द्र शाही, देवेन्द्र पौडेल, रमित ढुङ्गाना, मुस्कान खातुन, प्राप्ति पौडेल, इभा गिरीलगायतको अभिनय रहने जनाइएको छ । चलचित्र एसिड आक्रमण पीडितहरूको वास्तविक कथामा आधारित छ । चलचित्रमा एसिड आक्रमणमा परेका ३३ जना पीडितको कथालाई समेटेर बनाइएको जनाइएको छ ।