काठमाडौं । ताप्लेजुङको पाथीभरा याङ्वरक गाउँपालिकामा दुई घर जलेर नष्ट भएका छन् । पाथीभरा याङ्वरक गाउँपालिका –३ तिरिङ्गेको खानीटोलमा बिहीबार भएको आगलागीबाट एकै परिवारका दुई दाजुभाइको घर जलेर नष्ट भएको हो । तिरिङ्गेका वडाध्यक्ष पूर्णबहादुर तिवारीका अनुसार खानीटोलका स्थानीय देवीप्रसाद इजम लिम्बू र डम्बर लिम्बूको घर जलेर नष्ट भएको छ । दुई दाजुभाइको नजिक रहेको ढुङ्गा, माटो, काठ र जस्तापाताको प्रयोग भएको घर जलेर पूर्णरुपमा नष्ट भएको वडाध्यक्ष तिवारीले जानकारी दिनुभयो ।
विद्युत सर्ट भएर आगलागी भएको अनुमान गरिए पनि यथार्थ खुलिनसकेको उहाँले बताउनुभयो । आगलागीबाट घरमा रहेको खाद्यान्न, भाँडावर्तन, लत्ताकपडा लगायतका सामग्री जलेर नष्ट भएको छ । अहिले प्रहरी टोली पुगेर आगलागीबाट भएको क्षतिको विवरण सङ्कलन गर्ने काम भइरहेको पनि वडाध्यक्ष तिवारीले जानकारी दिनुभयो । गोरखापत्र
