काठमाडौं । लामो समयदेखि बन्द रहेको बाँकेको खजुरास्थित सुशील कोइराला प्रखर क्यान्सर अस्पतालको सिटी स्क्यानलगायतका महत्वपूर्ण उपकरण अझै पनि सञ्चालनमा आएका छैनन् । करिब ६ महिनाअघि अस्पतालको रेडियोलोजि विभागमा आगलागी हुँदा विद्युतका महत्वपूर्ण उपकरण र बिरामी परीक्षण गर्ने सिटी स्क्यानलगायतका उपकरणमा क्षति भएपछि ती उपकरण बन्द भएका थिए । तर ६ महिना बित्न लाग्दा पनि अझै ती महत्वपूर्ण उपकरण सञ्चालनमा नआउँदा सो अस्पतालमा सेवा लिन आउने सेवाग्राही नै घट्न थालेका छन् ।
आगलागीको करिब पाँच महिना बितेपछि विद्युतका उपकरणको मर्मत गरेर सञ्चालनमा ल्याउँदा सिटी स्क्यानको सिपियु र कन्ट्रोल बक्समा समस्या देखिएकोले सो विदेशबाट ल्याउनुपर्ने हुँदा झिकाइएकोले आउने बित्तिकै सञ्चालन गरिने अस्पतालका निर्देशक डा। प्रकाशप्रसाद शाहले बताउनुभयो । उहाँले सिटी स्क्यानको सिपियु जर्मनीबाट ल्याउनुपर्ने र करिब ३६ लाख रुपियाँ खर्च लाग्ने देखिएकोले ती उपकरण झिकाउन प्रक्रिया पूरा गर्न केही समय लागेको जनाउँदै दुई साताभित्र आउने र त्यसलगत्तै सिटी स्क्यान सञ्चालन गरिने बताउनुभयो । लामो समयदेखि सिटी स्क्यानलगायत अन्य उपकरण सञ्चालनमा नआउँदा उक्त अस्पतालमा आउने सेवाग्राहीहरूको सङ्ख्या तीन हजारको हाराहारीबाट घटेर दुई हजार आसपासमा झरेको अस्पतालले जनाएको छ । अस्पतालमा सेवा नपाउँदा र बाहिर गएर अति नै महँगोमा जाँच गराउनुपर्ने हुँदा सेवाग्राही नै घटेको सुशील कोइराला क्यान्सर अस्पताल विकास समितिका अध्यक्ष टेकेन्द्र मल्लले बताउनुभयो । उहाँले अस्पतालका महत्वपूर्ण उपकरण मेसिनहरू सुचारु गर्न प्रयास भइरहे पनि हालसम्म ठोस परिणाम आउन नसक्दा सेवाग्राहीहरूले निरन्तर दुःख पाइरहेको जनाउँदै छिटोभन्दा छिटो सुचारु गर्ने प्रयासमा आफूहरु लागेको बताउनुभयो ।
अस्पतालका उपकरण सञ्चालनमा नआउँदा सेवाग्राहीहरू हाल महँगो मूल्य तिरेर निजी प्रयोगशालामा जाँच गराउन बाध्य भएका छन् । अस्पतालमा सात हजार ५०० रुपियाँमा हुने सिटी स्क्यान निजी प्रयोगशालामा पन्ध्र हजार रुपियाँसम्म पर्ने सेवाग्राहीहरू बताउँछन् । यसले गर्दा अस्पतालमा आउने सेवाग्राहीहरूको सङ्ख्या निरन्तर घट्दो क्रममा छ । सोही प्रकारले उक्त अस्पतालमा जडान गरिएको बहुप्रतीक्षित २५ करोडको लिन्याक मेसिन जडान भएर पनि आठ महिनादेखि सञ्चालनमा आएको छैन । दक्ष जनशक्ति अभावका कारण सो मेसिन सञ्चालन हुन नसकेको जनाइएको छ । साथै अस्पतालमा मेडिकल अङ्कोलोजिस्ट र रेडियोलोजिस्टको पनि अभाव छ, जसका कारण सेवाग्राहीहरूले चितवन र भारतको लखनउसम्म धाउनुपर्ने अवस्था छ । गोरखापत्र
