काठमाडौं — दुई दशकसम्म कोमामा रहेका साउदी अरबका राजकुमार अल वालिद बिन खालिद बिन तलाल अल साउदको निधन भएको छ। लामो समयदेखि अचेत अवस्थामा रहेका कारण उनी ‘स्लिपिङ प्रिन्स’ (Sleeping Prince) को उपनामले विश्वभर चिनिएका थिए।
सन् २००५ मा, १५ वर्षको उमेरमा बेलायतको लन्डनमा सैनिक तालिम लिइरहेका बेला राजकुमारको गम्भीर सवारी दुर्घटना भएको थियो। त्यस दुर्घटनामा मस्तिष्कमा गहिरो चोट लागेपछि उनी कोमामा गए, र त्यसपछि उनी कहिल्यै होशमा फर्किन सकेनन्।
अमेरिका र स्पेनबाट आएका विज्ञ चिकित्सकहरूको टोलीद्वारा गरिएको लामो उपचार प्रयास सफल नभए पनि उनका पिता राजकुमार खालिदले आशाको दियो निभिन दिएनन्। चिकित्सकहरूले जीवन रक्षाका उपकरण हटाउन सुझाए पनि उनले सधैं “ईश्वरीय चमत्कार”मा विश्वास राख्दै छोरालाई बचाइराख्ने निर्णय लिएका थिए।
राजकुमार वालिदको अवस्थाले साउदी जनता मात्र नभई संसारभरका मानिसको ध्यान तानेको थियो। परिवारका सदस्यहरूले उनलाई कुरानको पाठ सुनाउँदै राखेका थिए, र समय–समयमा उनका शरीरमा देखिने हल्का गतिविधिहरूले निको हुने आशा जागृत राख्थ्यो।
गल्फ न्युजका अनुसार, २०२५ जुलाई १९ मा साउदी अरबको विशेष स्वास्थ्य केन्द्रले राजकुमार वालिदको निधनको पुष्टि गरेको हो। उनको निधनसँगै सामाजिक सञ्जालमा ‘#SleepingPrince’ ह्यासट्याग ट्रेन्डिङमा आएको छ। हजारौं मानिसले श्रद्धाञ्जली अर्पण गर्दै राजकुमारलाई धैर्यता, पितृमाया र आस्थाको प्रतीकका रूपमा सम्झिएका छन्।
राजकुमारको निधनपछि विशेष गरी उनका पिताप्रति जनताले गहिरो सम्मान प्रकट गरेका छन्। २० वर्षसम्म अचेत छोराको शय्या छेउमा निरन्तर बसेर साथ दिएका पिता खालिदको समर्पणलाई सारा विश्वले श्रद्धाका साथ सम्झिरहेको छ।
राजकुमार अल वालिदको जीवनले चिकित्सा विज्ञान, पारिवारिक प्रेम र आध्यात्मिक आस्थाबीचको अद्वितीय सम्बन्धलाई गहिरो रूपमा उजागर गरेको छ।
