काठमाडौं — सिन्धुली जिल्लामा अविरल वर्षाको सम्भावना रहेको भन्दै सुनकोशी नदी आसपासका क्षेत्रमा सतर्कता अपनाउन आग्रह गरिएको छ। जिल्ला प्रशासन कार्यालय, सिन्धुलीले एक विज्ञप्ति जारी गर्दै आज रातिदेखि आगामी साउन ५ गते (सोमबार) सम्म भारी वर्षा हुन सक्ने पूर्वानुमानका आधारमा बासिन्दालाई सावधानी अपनाउन अनुरोध गरेको हो।
वर्षाका कारण नदीमा पानीको सतह बढ्न सक्ने, भू–स्खलन तथा बाढीको सम्भावना रहेको भन्दै बीपी राजमार्ग र मध्यपहाडी राजमार्गमा यात्रा गर्दा विशेष ध्यान दिन प्रशासनले सवारी चालक तथा यात्रुहरूलाई सचेत गराएको छ। मौसम पूर्वानुमान महाशाखाले पनि यस अवधिमा अत्यधिक वर्षा हुने सम्भावना औँल्याउँदै स्थानीय सरकार, सुरक्षाकर्मी, सञ्चार माध्यम र नागरिकलाई आवश्यक सतर्कता अपनाउन आह्वान गरेको छ।
प्रशासनले बाढी, पहिरो वा अन्य विपद्जन्य जोखिम देखिएमा तत्काल स्थानीय प्रशासन वा प्रहरीसँग सम्पर्क गर्न समेत अनुरोध गरेको छ। जोखिमयुक्त स्थानमा बसोबास गरिरहेका नागरिकलाई सुरक्षित स्थानमा स्थानान्तरणको तयारी गर्न भनिएको छ। सुनकोशी आसपासका क्षेत्र, खासगरी तल्लो बस्ती, खेतबारी तथा सडक किनारमा रहेका बासिन्दाहरूलाई राति सतर्क रहनु, बालबालिका र बृद्धबृद्धाको सुरक्षामा ध्यान दिनु, र आकस्मिक अवस्थाका लागि तयारी अवस्थामा रहनु आवश्यक छ।
