काठमाडौं, असोज २० – शनिवारदेखि परेको अविरल वर्षाका कारण भत्किएको झापाको भालुखोलास्थित डाइभर्सन पुनः निर्माण भएसँगै पूर्व–पश्चिम राजमार्गमा सवारी आवागमन सुचारु भएको छ। बाढीका कारण अवरुद्ध भएको उक्त सडक खण्ड ३५ घण्टापछि सञ्चालनमा आएको हो।
डाइभर्सन भत्किएपछि सवारीसाधनहरू वैकल्पिक भित्री सडकमार्ग प्रयोग गरी गन्तव्यतर्फ गइरहेका थिए। आइतवारदेखि नै डाइभर्सन मर्मत तथा पुनर्निर्माणको काम सुरु गरिएको थियो।
सोमबार बिहान ११ बजेदेखि सवारी आवागमन नियमित रूपमा सञ्चालनमा आएको जिल्ला प्रहरी कार्यालय झापाका प्रमुख प्रहरी उपरीक्षक राजन लिम्बूले जानकारी दिनुभयो। उहाँका अनुसार, बिहानैदेखि दुईवटा जेसिबीसहितका उपकरण प्रयोग गरेर निर्माण कार्य तीव्र बनाइएको थियो।
वर्षा घट्दै गएपछि झापाको जनजीवन पनि सामान्यतर्फ फर्किन थालेको प्रहरीले जनाएको छ।
