काठमाडौं । धनकुटा जिल्लाका दुई फरक स्थानमा झुण्डिएको अवस्थामा दुई जना पुरुषको शव फेला परेको छ। एकजना मृतक आफ्नै दिदीको घरको कोठाभित्र झुण्डिएको अवस्थामा भेटिए भने अर्का व्यक्ति घर नजिकैको रुखमा झुण्डिएको अवस्थामा फेला परेका हुन्।
पहिलो घटना साँगुरीगढी गाउँपालिका–४, एक्सेरुङमा भएको हो। करिब ४५ वर्षीय एक पुरुष आफ्नै दिदी फूलमाया लिम्बूको घरमा पाहुना आएका थिए। उनी सोमबार साँझ करिब साढे ५ बजे घरको माथिल्लो तलाको कोठाभित्र प्लास्टिकको सुत्रीको पासो लगाई झुण्डिएको अवस्थामा फेला परेका हुन्। घटनाको पुष्टि गर्दै जिल्ला प्रहरी कार्यालय धनकुटाका प्रवक्ता डिएसपी राजन कार्कीले जानकारी दिनुभयो।
दोस्रो घटना भने महालक्ष्मी नगरपालिका–१, मचेपु पारी खाप्राङमा भएको हो। करिब ५५ वर्षीय हिक्मत दर्जी घर छेउमा रहेको गोगनको रुखमा कपडाको डोरीको पासो लगाई झुण्डिएको अवस्थामा मंगलबार बिहान करिब ८ बजे फेला परेको प्रहरीले जनाएको छ।
प्रहरीका अनुसार दुवै घटनास्थलमा प्रहरी टोली पुगिसकेको छ र घटनाबारे विस्तृत अनुसन्धान जारी रहेको छ। घटनाका कारण र पृष्ठभूमिबारे अहिले नै केही भन्न सकिने अवस्था नरहेको डिएसपी कार्कीले बताउनुभयो।
