काठमाडौं, नेपाली सुनचाँदी बजारमा शुक्रबार सुनको मूल्यमा ठूलो वृद्धि भएको छ। नेपाल सुनचाँदी व्यवसायी महासङ्घका अनुसार छापावाल सुनको मूल्य प्रतितोला ७,१०० रुपैयाँले बढेर दुई लाख ५८ हजार रुपैयाँ पुगेको छ।
त्यसैगरी, १० ग्राम सुनको मूल्य दुई लाख २१ हजार १९५ रुपैयाँ तोकिएको छ।
यसअघि बिहीबार सुनको मूल्य प्रतितोला दुई लाख ५० हजार ९०० रुपैयाँ थियो।
सुनसँगै चाँदीको मूल्य पनि बढेको छ। शुक्रबार चाँदी प्रतितोला ७५ रुपैयाँले बढेर तीन हजार ३५० रुपैयाँमा कारोबार भएको महासङ्घले जनाएको छ। बिहीबार चाँदी प्रतितोला तीन हजार २७५ रुपैयाँमा बिक्री भएको थियो।
महासङ्घका अनुसार विगत एक महिनामा नेपाली बजारमा सुनको मूल्यमा उल्लेखनीय वृद्धि देखिएको छ। भदौ ३० गते सुन प्रतितोला दुई लाख १५ हजार रुपैयाँ थियो भने हालसम्म आइपुग्दा ४३ हजार रुपैयाँको वृद्धि भइसकेको छ।
विश्लेषकहरूका अनुसार अन्तर्राष्ट्रिय बजारमा अमेरिकी डलरको उतारचढाव, मध्यपूर्वमा जारी तनाव, तथा आर्थिक अनिश्चितताका कारण लगानीकर्ताहरू सुनमा आकर्षित भइरहेका छन्, जसको असर नेपाली बजारमा प्रत्यक्ष देखिएको हो।
