काठमाडौं कात्तिक १ – मकवानपुर जिल्लाको बकैया गाउँपालिका र हेटौँडामा शुक्रबार छुट्टाछुट्टै घटनामा करेन्ट लागेर दुई जना घाइते भएका छन्।
पूर्वी मकवानपुरको बकैया गाउँपालिका–६ बेलबोटमा करेन्ट लागेर २१ वर्षीय आयुष लामा घाइते भएका हुन्। काभ्रे महाभारत गाउँपालिकाका लामा ट्रकको छतमा बसेका अवस्थामा करेन्ट लागेको प्रहरीले जनाएको छ।
बा.प्र.०३–००१ ख २१६७ नम्बरको ट्रक बेलबोटबाट काठ लोड गरी हेटौँडातर्फ आउँदै थियो। घरघरमा तानिएको ११ हजार भोल्टको विद्युत् लाइन पन्छाउँदै अगाडि बढ्ने क्रममा अचानक तार छोइँदा लामा करेन्ट लागेर ट्रकबाट खसेका हुन्।
उनी हाल मकवानपुर सहकारी अस्पतालमा उपचाररत छन्। दुबै खुट्टा र शरीरका विभिन्न भागमा चोट लागेको जनाइएको छ। घटनापछि ट्रक र चालक ४० वर्षीय रमेशप्रसाद चौहानलाई प्रहरीले नियन्त्रणमा लिएको छ।
त्यस्तै, अर्को घटना हेटौँडा उपमहानगरपालिका–१० कर्रा चोकमा भएको हो। २५ वर्षीय विमल बम्जन करेन्ट लागेर घाइते भएका छन्। हेटौँडा उपमहानगरपालिका–१६ उत्तरपानी निवासी बम्जन पान पसल नजिकको तारमा छुँदा करेन्ट लागेको हो।
बम्जनलाई सुरुमा हेटौँडा अस्पतालमा भर्ना गरिएको थियो भने अहिले थप उपचारका लागि मोडेल अस्पतालमा रिफर गरिएको छ।
दुबै घटनाको थप अनुसन्धान भइरहेको बागमती प्रदेश प्रहरीले जनाएको छ।
