काठमाडौं , धौलागिरी चक्रीय पदमार्गमा पदयात्रा गर्ने क्रममा हराएका एक नेपाली पथप्रदर्शक र जर्मन नागरिक २४ घण्टापछि भेटिएका छन्। उनीहरू म्याग्दीको धवलागिरी गाउँपालिका–४ मुदीस्थित धवलागिरी हिमालको आधार शिविरदेखि मुस्ताङको थासाङ गाउँपालिका–१ मा पर्ने थम्पुस पिक तर्फ जाँदै थिए।
शुक्रबार रातिदेखि सम्पर्कविहीन उनीहरू शनिबार राति मुस्ताङ प्रहरीले घरपझोङ गाउँपालिका–३ स्याङमा फेला पारेको छ। भेटिएका जर्मनीका ३२ वर्षीय दामिनो डेल्फाप्लो र नेपाली पथप्रदर्शक मिमा शेर्पा शनिबार राति ९ बजे घरपझोङ पुगेका थिए।
सेभेन समिट ट्रेकिङमार्फत पदयात्रा गरेका उनीहरू राति बाटोबाट भट्किएर जंगलतर्फ लाग्दा हराएको बुझिएको थियो। खोजीका लागि ट्रेकिङ कम्पनीले हेलिकोप्टरसमेत परिचालन गरेको थियो। भेटिएका दुवैको स्वास्थ्य अवस्था सामान्य रहेको जानकारी प्राप्त भएको छ।
