काठमाडौं । नवनियुक्त ऊर्जा, जलस्रोत तथा सिँचाइ मन्त्री विराजभक्त श्रेष्ठले मन्त्रालयको सेवा प्रवाहलाई प्रभावकारी, पारदर्शी र नागरिकमुखी बनाउन निर्देशन दिनुभएको छ। आइतबार मन्त्रालयमा आयोजित छलफलमा मन्त्रालयको समग्र अवस्था, हालसम्मको प्रगति, विद्यमान चुनौती र आगामी कार्यदिशाबारे उच्च पदस्थ कर्मचारीहरूसँग जानकारी लिँदै उहाँले सो निर्देशन दिनुभएको हो। मन्त्री श्रेष्ठले मन्त्रालयअन्तर्गतका विभिन्न आयोजना तथा कार्यक्रमहरूको प्रगति अवस्थाबारे सूक्ष्म जानकारी लिनुभएको थियो।
परिणाममुखी कार्यशैलीमा जोड
ऊर्जा क्षेत्रको दिगो विकास, जलस्रोतको समुचित उपयोग र सिँचाइ प्रणालीको विस्तारमार्फत कृषि उत्पादन वृद्धि गर्ने सरकारको लक्ष्य रहेको मन्त्री श्रेष्ठले उल्लेख गर्नुभयो। उहाँले भन्नुभयो, “लक्ष्य प्राप्तिका लागि स्पष्ट कार्ययोजना, समयबद्ध कार्यान्वयन र उत्तरदायित्वपूर्ण कार्यशैली आवश्यक छ। जनताले प्रत्यक्ष महसुस गर्ने गरी परिणाममुखी कार्यसम्पादनलाई प्राथमिकता दिनुपर्छ।”
अनुशासन र समन्वयको आवश्यकता
मन्त्रालयभित्र समन्वय, अनुशासन र परिणाममुखी कार्यसंस्कृतिको विकास गर्नुपर्नेमा जोड दिँदै मन्त्री श्रेष्ठले कर्मचारीहरूलाई पूर्ण प्रतिबद्धता, इमानदारी र उच्च मनोबलका साथ काम गर्न निर्देशन दिनुभयो। ऊर्जा क्षेत्रमा आत्मनिर्भरता हासिल गर्ने दिशामा सबै पक्ष एकजुट भएर अगाडि बढ्नुपर्ने उहाँको भनाइ थियो। आगामी दिनमा देखिने चुनौतीहरूलाई अवसरका रूपमा रूपान्तरण गर्दै नीति, योजना र कार्यान्वयनबीच प्रभावकारी समन्वय कायम गरी मन्त्रालयको कार्यक्षमता अभिवृद्धि गर्ने प्रतिबद्धता समेत उहाँले व्यक्त गर्नुभयो।
प्रमुख बुँदाहरू:
- सेवा प्रवाहलाई पारदर्शी र नागरिकमुखी बनाउने निर्देशन।
- समयबद्ध कार्यान्वयन र उत्तरदायित्वपूर्ण कार्यशैलीमा जोड।
- ऊर्जा आत्मनिर्भरता र सिँचाइ विस्तारमार्फत कृषि उत्पादन वृद्धिको लक्ष्य। गोरखापत्र
