काठमाडौं, कात्तिक ४
मुनाका सम्पादक भवानीप्रसाद सुवेदीलाई पितृशोक परेको छ। उहाँका पिता पुण्यप्रसाद सुवेदीको कात्तिक १ गते काठमाडौँको शहीद गंगालाल राष्ट्रिय हृदयरोग केन्द्रमा ९३ वर्षको उमेरमा निधन भएको हो।
विसं १९९० साल भदौ ३० गते भोजपुरमा जन्मिनुभएका सुवेदी झापाको कमल गाउँपालिका हुँदै हाल भक्तपुरको मध्यपुर थिमी, लोकन्थलीमा बसोबास गर्दै आउनुहुन्थ्यो।
उहाँले झापामा शिक्षा र समाजसेवाको क्षेत्रमा महत्वपूर्ण योगदान दिनुभएको थियो। नवदुर्गे विद्यालयका संस्थापक सदस्य तथा सञ्चालक समितिका अध्यक्षका रूपमा उहाँ सक्रिय रहनुभएको थियो। त्यस्तै, नरेन्द्र जनता माविसहित अन्य विद्यालयको सञ्चालकका रूपमा समेत उहाँले काम गर्नुभएको थियो।
शिक्षा र समाजसेवामा लामो समय सक्रिय रहेका पुण्यप्रसाद सुवेदीका दुई छोरा र तीन छोरी छन्।
