काठमाडौं । कैलालीको जानकी गाउँपालिकामा तीन बालिकाको पानीमा डुबेर मृत्यु भएको छ। रानी जमरा सिँचाइ प्रणाली अन्तर्गतको कुलरिया नदीमा पौडी खेल्ने क्रममा उनीहरूको मृत्यु भएको हो।
इलाका प्रहरी कार्यालय टीकापुरका प्रमुख प्रहरी नायब उपरीक्षक प्रकाश डाँगीका अनुसार मृत्यु हुनेमा जानकी गाउँपालिका–५ नवलपुरकी १२ वर्षीया सुलोचना उपाध्याय, १० वर्षीया निषा बजगाई र ८ वर्षीया मानसी बजगाई रहेका छन्।
शुक्रबार मध्यान्ह पौडी खेल्ने क्रममा एक बालिका नदीमा डुबेपछि बाँकी दुई जना उद्धार गर्न जाँदा तिनै जना बेपत्ता भएका थिए। स्थानीयवासीले घटनास्थलमा पुगेर खोजी गरी टीकापुर अस्पताल पुर्याए पनि चिकित्सकले तीनै जनालाई मृत घोषणा गरेका थिए।
मृतक निषा र मानसी बजगाई दिदीबहिनी हुन्। तिहारको अवसरमा उनीहरू टीकापुर नगरपालिका–१ ब्लक नं. १० स्थित मामाको घर गएका थिए। सुलोचना उपाध्याय बजगाई दिदीबहिनीकी मामाकी छोरी थिइन्।
दिदीबहिनी जनजागृति माध्यमिक विद्यालय, टीकापुरमा कक्षा ५ मा अध्ययनरत रहेको विद्यालय स्रोतले जनाएको छ।
