काठमाडौं । बर्दियामा भएको मोटरसाइकल दुर्घटनामा एकजनाको मृत्यु भएको छ भने अर्का व्यक्ति घाइते भएका छन्। मृत्यु हुनेमा गुलरिया नगरपालिका–७ गुलरिया गाउँका ३० वर्षीय विकास यादव रहेका छन्। त्यस्तै, मोटरसाइकल चालक ३६ वर्षीय रामदल सोनी घाइते भएको जिल्ला प्रहरी कार्यालय बर्दियाले जनाएको छ।
राजापुरदेखि गुलरिया तर्फ आउँदै गरेको लु.प्र.०३–००१ प ४१५७ नं को मोटरसाइकल राजापुर नगरपालिका–१० जोगीपुरस्थित हुलाकी सडकखण्डमा राति करिब ११ बजे अनियन्त्रित भई दुर्घटना भएको हो। दुर्घटनापछि दुवैजनालाई तत्काल प्राथमिक स्वास्थ्य केन्द्र राजापुरमा लगिएको थियो। त्यहाँबाट थप उपचारका लागि बर्दिया अस्पताल गुलरिया पठाइएकोमा उपचारको क्रममा यादवको मृत्यु भएको हो। घाइते चालक सोनीलाई भने थप उपचारका लागि नेपालगञ्ज रेफर गरिएको प्रहरी नायब उपरीक्षक देवेन्द्रकुमार मल्लले जानकारी दिनुभयो। मृतकको शव हाल बर्दिया अस्पताल गुलरियामै राखिएको छ।
