काठमाडौं । जनता समाजवादी पार्टी (जसपा) नेपालका केन्द्रीय सचिव शैलेन्द्रप्रसाद साहले मधेश प्रदेशमा पछिल्ला दिनमा देखिएको राजनीतिक अस्थिरता कुनै संयोग नभई योजनाबद्ध षड्यन्त्रको परिणाम भएको आरोप लगाउनुभएको छ।
आइतबार एक विशेष कुराकानीमा उहाँले सङ्घीयता कमजोर पार्ने र मधेशको अधिकारमाथि प्रहार गर्ने नियतसहितका गतिविधिहरू तीव्र बन्दै गएको बताउनुभयो। “सङ्घीयता प्राप्त गर्न मधेशले ठूलो आन्दोलन, बलिदान र संघर्ष गरेको इतिहास छ,” साहले भन्नुभयो, “तर अहिले यही व्यवस्थामाथि प्रश्न उठाउने, प्रदेश सरकार अस्थिर पार्ने र जनताको विश्वास कमजोर बनाउने प्रयास भइरहेको छ।”
सचिव साहले सङ्घीयता र समावेशी लोकतन्त्रका पक्षधर सबै राजनीतिक शक्तिहरूलाई मौन नबस्न आग्रह गर्नुभयो। उहाँले समयमै सचेत भई एकजुट भएर यस्तो षड्यन्त्रको विरोध गर्नुपर्ने आवश्यकता औँल्याउनुभयो।
“सङ्घीयता हाम्रो अधिकार, पहिचान र देशको स्थायित्वको आधार हो,” उहाँले जोड दिनुभयो, “त्यसैले सङ्घीयता जोगाऔँ, मधेशको अधिकार र स्वाभिमानको रक्षा गरौं, र राजनीतिक स्थायित्वका लागि एकजुट बनौं।”
प्रदेशसभा सदस्यहरूलाई समेत सन्देश दिँदै उहाँले भन्नुभयो, “प्रदेश नामाङ्कनको समयमा हामीले जसरी एकताको उदाहरण प्रस्तुत गरेका थियौं, अहिले फेरि त्यही एकता देखाउने बेला आएको छ। राजनीतिक स्थायित्वका लागि सबै शक्तिहरू एक हुनुपर्छ।”
