काठमाडौं । नेपाल प्रिमियर लिग (एनपिएल) अन्तर्गत आज काठमान्डु गोरर्खाज र सुदूरपश्चिम रोयल्स बीच प्रतिस्पर्धा हुँदैछ। कीर्तिपुरस्थित त्रिवि अन्तर्राष्ट्रिय क्रिकेट मैदानमा खेल साँझ ४ बजे सुरु हुने छ। लगातार दोस्रो जितको खोजीमा रहेको काठमान्डुले पहिलो खेलमै साविक विजेता जनकपुर बोल्ट्सलाई पाँच विकेटले पराजित गर्दै उत्कृष्ट सुरुआत गरेको थियो। त्यो जितका कारण टोली उच्च मनोबलसहित मैदान उत्रँदैछ।
यता साविक उपविजेता सुदूरपश्चिम रोयल्स दोस्रो संस्करणमा सुखद सुरुवात गर्ने लक्ष्यमा छ। पहिलो संस्करणको फाइनलमा जनकपुरसँग पाँच विकेटले पराजित भएको स्मरण सुदूरपश्चिमका खेलाडीहरूलाई अझ प्रेरणादायी बन्ने अपेक्षा गरिएको छ। काठमान्डुले जनकपुरलाई हराएपछि आत्मविश्वास बढेको छ भने सुदूरपश्चिमले अघिल्लो सिजनको शानदार प्रदर्शन दोहोर्याउँदै दर्शकहरूको भरोसा र मन जित्ने लक्ष्य राखेको छ। सुदूरपश्चिम क्षेत्रमा क्रिकेटको लोकप्रियता उच्च भएकाले टोलीलाई बलियो समर्थन हुने अनुमान छ।
पूर्व राष्ट्रिय प्रशिक्षक मोन्टी देसाईको प्रशिक्षणमा रहेको काठमान्डु र राष्ट्रिय टोलीका घरेलु प्रशिक्षक जगत टमटाले प्रशिक्षण गरिरहेको सुदूरपश्चिमबीचको आजको भिडन्त निकै रोचक हुने अपेक्षा गरिएको छ। दुवै टोलीमा विदेशी तथा स्वदेशी खेलाडीको उत्कृष्ट संयोजन भएकाले प्रतिस्पर्धा कडा हुने देखिन्छ।
