काठमाडौं । कोशी प्रदेश सरकारको प्रदेश योजना आयोगको उपाध्यक्षमा विराटनगर महानगरपालिकाका तारानाथ निरौला नियुक्त हुनुभएको छ । बुधबार बसेको कोशी प्रदेश सरकारको मन्त्रीपरिषद् बैठकले उहाँलाई उपाध्यक्षमा नियुक्त गर्ने निर्णय गरेको हो । यसअघिका उपाध्यक्ष डा. राजेन्द्र अधिकारीले गत कात्तिक २० गतेदेखि लागु हुने गरी दिएको राजीनामा स्वीकृत गर्दै बुधबार बसेको बैठकले निरौलालाई नियुक्त गर्ने निर्णय गरेको हो ।
त्रिभुवन विश्वविद्यालयबाट समाजशास्त्रमा स्नातकोत्तर र खाद्य प्रविधिमा स्नातक तहसम्मको अध्ययन पूरा गर्नुभएका निरौलाले स्थानीय तहको योजना तर्जुमा, क्षमता विकास र मापदण्ड निर्धारणमा प्रदेश तथा सङ्घीय सरकारको विज्ञका रूपमा रहेका काम गरिसक्नुभएको छ । उहाँले कोशी प्रदेश सरकारको दोस्रो आवधिक योजना निर्माणमा समेत विज्ञका रूपमा रहेर काम गर्नुभएको थियो । यसअघि उहाँले हात्तीसार क्याम्पस धरानमा एक वर्ष, हेटौँडास्थित मकवानपुर बहुमुखी क्याम्पसमा १४ वर्ष र विराटनगरस्थित महेन्द्र मोरङ आदर्श बहुमुखी क्याम्पसमा एक वर्ष प्राध्यापनसमेत गर्नुभएको थियो ।
त्यसै गरी उहाँसँग स्थानीय तहमा रहेर लामो समय काम गरेको अनुभवसमेत रहेको छ । उहाँले हेटौँडा महानगरपालिकामा २०५१ सालदेखि २०५७ सालसम्म र विराटनगर महानगरपालिकामा विसं २०५७ देखि विसं २०७० सालसम्म खाद्य प्रविधिलगायत विभिन्न शाखाको जिम्मेवारीमा रहेर काम गर्नुभएको थियो । त्यस्तै नवनियुक्त निरौलासँग बैङ्क तथा वित्तीय क्षेत्रको समेत १० वर्षभन्दा बढीको अनुभव रहेको छ । गोरखापत्र
