काठमाडौं । दृष्टिविहीन महिला टी–२० विश्वकप क्रिकेट २०२५ मा उपविजेता बनेको नेपाली टिमलाई प्रधानमन्त्री सुशीला कार्कीले बधाइ व्यक्त गर्नुभएको छ। श्रीलङ्काको कोलोम्बोस्थित पी. सारा ओभल मैदानमा आइतबार सम्पन्न फाइनल खेलमा नेपाल भारतसँग सात विकेटले पराजित भएको थियो। फाइनलमा हार व्यहोरे पनि नेपाली टिमले प्रस्तुत गरेको अदम्य साहस, खेलकुद भावना र उत्कृष्ट प्रदर्शनको प्रशंसा गर्दै प्रधानमन्त्री कार्कीले सामाजिक सञ्जालमार्फत बधाइ सन्देश दिनुभएको हो। उहाँले लेख्नुभएको छ, “दृष्टिविहीन महिला टी–२० विश्वकप क्रिकेट २०२५ श्रीलंकामा सहभागी नेपाली टोली उपविजेता बन्न सफल भएको छ। फरक शारीरिक अवस्था र दैनिक जीवनका अनेक चुनौतीका बावजुद विश्व मंचमा नेपाल र नेपालीको शिर उँचो राख्नुभएकोमा हार्दिक बधाइ।” प्रधानमन्त्रीले यो उपलब्धिले दृष्टिविहीन महिलाको क्षमता, समर्पण र दृढताले अन्तर्राष्ट्रिय क्षेत्रमै कस्तो प्रभाव पार्न सक्छ भन्ने उदाहरण प्रस्तुत गरेको बताउनुभएको छ।
