काठमाडौं । जिल्लाको दक्षिणी क्षेत्रको बाजुरा जिल्लासँग सिमाना जोडिएको ताँजाकोट गाउँपालिकाका सबै वडाहरुमा सडक सञ्जाल जोडिएका छन् । संङ्घीय लागु भएयता आठ वर्षमा गाउँपाालिका, प्रदेश सरकार र सङ्घीय सरकारको लागत साझेदारीमा सडक निर्माण कार्य भएपछि सिङ्गो गाउँपालिका सडक सञ्जालमा जोडिएको हो । ताँजाकोट गाउँपालिकाका पाँच वटै वडाहरु सडक सञ्जालसँग जोडिएको गाउँपालिका अध्यक्ष लालकेश जैसीले बताउनुभयो । वडा मात्र नभएर २१ मा १९ वटा बस्ती पनि सडक सञ्जालसँग जोडिएको बताउँदै उहाँले अब वडा नम्बर ३ मासपुर र वडा नम्बरको चिई गाउँ मात्र जोडिन बाँकी रहेको बताउनुभयो ।
मासपुर गाउँका लागि सडक निर्माण कार्य भइरहेको र अब यसै आर्थिक वर्षमा उक्त गाउँमा सडक जोडिने र अर्को सडक नजोडिएको चिई गाउँमा पनि आफ्नै कार्यकालमा सडक सञ्जाल जोडिने अध्यक्ष जैसीकाो भनाइ छ । पहिलो र दोस्रो कार्यकालको हालसम्मको अवधिमा गाउँँपालिकाभर सडक सञ्जालको निर्माण कार्यले फड्को मारेको उहाँले बताउनुभयो । यसले गर्दा ग्रामीण सडक समेत राष्ट्रिय सडक सञ्जालसंग जोडिएका छन् । गाउँपालिका केन्द्रमा छ देखि आठ घण्टा पैदल हिँड्नु पर्ने समय बचत भएको छ । सडक जोडिएपछि गाउँपालिका केन्द्रबाट एकदेखि डेढ घण्टामा पुग्ने कार्य भइरहेको उहाँको भनाइ छ । आफ्नो गाउँपालिकाका वडा मात्र नभएर छिमेकी अदानचुली गाउँपालिकाको सिमानासम्म सडक निर्माण गर्ने कार्य समेत भएको उहाँले बताउनुभयो ।
सवै वडामा सडक जोडिएको कारण स्थानीय बिरामी पर्दा स्टेचरमा बोक्नु पर्ने बाध्यता मात्र नहटेर बिरामीलाई समयमै स्वास्थ्य चौकीमा पुर्याउन पनि सहज भएको छ । हाल सडक नजोडिएका दुई बस्ती बाहेक अन्य सबै बस्तीका स्थानीयले पैदल हिँड्नु पर्ने बाध्यता पनि हटेको छ । विकास निर्माणका सामानहरु पनि ढुवानीमा सहजता भएको छ । सडक जोडिएकै कारण आरसिसि भवन निर्माणको क्रम बढेको छ भने अन्य विकास निर्माणका सामग्री पनि सस्तो भएका छन् । सबै वडा सडक सञ्जालसँग जोडिने हुम्ला जिल्लाका सात वटा गाउँँपालिका मध्य ताँजाकोट पहिलो भएको छ । गोरखापत्र
