काठमाडौं । मोरङको रतुवामाई नगरपालिकाले आन्तरिक आम्दानी नभएका सामुदायिक विद्यालयहरूलाई विद्युत् महसुल तिर्न सहयोग पुर्याउन राहत रकम उपलब्ध गराएको छ। नगर क्षेत्रका आठ माध्यमिक विद्यालय र २७ आधारभूत विद्यालयले महसुल भुक्तानीमा समस्या भोगेपछि नगरपालिकाले यो व्यवस्था गरेको हो। नगरपालिकाका शिक्षा शाखा प्रमुख रविन्द्र पण्डितका अनुसार आठ वटा माध्यमिक विद्यालयलाई वार्षिक २० हजार रुपैयाँ र २७ वटा आधारभूत विद्यालयलाई वार्षिक १४ हजार रुपैयाँ राहतस्वरूप प्रदान गरिएको छ। नगरका पाँच माध्यमिक र एक आधारभूत विद्यालयले पर्याप्त आन्तरिक आम्दानी देखिएकाले उनीहरूले भने यो सुविधा पाएका छैनन्।
लामो समय माध्यमिक विद्यालयको प्रमुख रहेर सेवानिवृत्त भएका नागेश्वरप्रसाद सिंह गनगाई हाल नगरप्रमुख छन्। उनले सरकारी विद्यालयको शैक्षिक गुणस्तर बढ्न नसक्नुको प्रमुख कारण विद्यालयहरूले प्रविधिमैत्री शैक्षिक वातावरण विकास गर्न नसक्नु भएको बताए। विद्युत् आधारित शिक्षण सामग्री नगरले उपलब्ध गराए पनि विद्युत् महसुल तिर्न नसक्दा ती सामग्री प्रयोगमै नआउने अवस्थाले शिक्षणमा चुनौती देखिएको नगरप्रमुख सिंहले बताए। साथै विद्यार्थी संख्या कम भएका विद्यालयहरूलाई एकीकृत गर्ने योजना समेत अघि सारिएको उनको भनाइ छ।
