काठमाडौं । ट्रयाक खुलेको २५ वर्षपछि बागलुङ नगरपालिका –७ को मूलपानी–तितौरे सडक कालोपत्र भएको छ । सदरमुकाम नजिक रहे पनि लामो समयसम्म स्तरोन्नति हुन नसकेको उक्त सडक कालोपत्रे भएपछि स्थानीयवासी खुशी भएका छन् । बागलुङ नगरपालिका –७ का वडाअध्यक्ष मेघनाथ गैरेका अनुसार मुलपानी–ढिकिचौर–कालिमाति हुँदै तितौरे जोड्ने ८.६ किलोमिटर रहेको उक्त सडक २०५८ सालमा ट्रयाक खुलेको थियो । विश्व बैंकको अनुदान सहयोगमा ४९ करोड ७१ लाख लागतमा २०८१ जेठ २३ गते आशिष फेवा संयुक्त निर्माण कम्पनीसँग ठेक्का सम्झौता भई निर्माणकार्य अघि बढाइएको हो ।
सडक विस्तार, नाली, पर्खाल निर्माण, घुम्ती तथा ग्रेड सुधारको काम सम्पन्न गरेर कालोपत्रको काम अन्तिम चरणमा पुगेको निर्माण कम्पनीका इन्जिनियर मनोज शर्माले जानकारी दिनुभयो । दुई दशकभन्दा बढी समयसम्म स्तरोन्नति नहुँदा समस्या भोग्दै आएका स्थानीयलाई सडक कालोपत्र भएसँगै राहत मिलेको छ । यसले गाउँमा उत्पादन हुने कृषि तथा स्थानीय उत्पादनको बजारीकरणमा समेत सहयोग पुग्ने स्थानीयको भनाइ छ । सडक कालोपत्र भएपछि जीर्ण सडकका कारण वर्षामा हिलो र हिउँदमा धुलोको सास्ती बेहोर्न नपर्ने भन्दै स्थानीय तुलप्रसाद विश्वकर्माले खुशी व्यक्त गर्नुभयो । “हाम्रो गाउँमा यसभन्दा अगाडि धेरै समस्या थियो, धुलो धुवाँ धेरै खाइयो, पर्खाइ पनि लामो भयो” स्थानीय विश्वकर्माले भन्नुभयो, “सडक कालोपत्रे हुने नहुने निश्चित थिएन । हामीले त आशा पनि मारिसकेका थियौं, तर अहिले सडक कालोपत्र भएसँगै केही थप विकास हुने आशा लिएका छौँ ।”
मूलपानी–तितौरे सडक कालोपत्रे भएसँगै यही मार्ग प्रयोग गरी काठे खोलाको भीमापोखरा र धम्जासम्म छोटो दूरीमा पुग्न सकिने वडा अध्यक्ष गैरेले जानकारी दिनुभयो । नगरपालिकाले विश्व बैंकको सहयोगमा यसअघि वडा नम्बर ४ को साढे २ किमी ओडारचौर–ढोडेनी सडक खण्डलाई ८ देखि १० मिटरसम्म चौडा बनाइ कालोपत्रे गरेको छ । वडा १ रामरेखाको गणेशघुम्तीदेखि निरयघाट जोड्ने १ किलोमिटर ६ सय लम्बाइको सडक कालोपत्र सम्पन्न भइसकेको इन्जिनियर सुनिल ठाकुरले जानकारी दिनुभयो ।
विश्व बैंकको सहयोगमा निर्माणाधीन तीन सडकको काम ९२ प्रतिशत सम्पन्न भइसकेको इन्जिनियर ठाकुरको भनाइ छ । विश्व बैंकको अनुदान बागलुङ नगरपालिका सहित देशभरका १७ नगरपालिकाले प्राप्त गरेका छन् । ती सडकहरू ८ मिटर चौडा रहेका छन् । गोरखापत्र
