काठमाडौं । इलामको पश्चिमी क्षेत्रलाई लक्षित गर्दै निर्माण गरिएको आफ्नै नयाँ भवनबाट इलाका प्रशासन कार्यालय मङ्गलबारेले आजदेखि प्रशासनिक सेवा सुरु गरेको छ। सघन सहरी तथा भवन निर्माण आयोजना झापाको प्राविधिक सहयोगमा सम्बन्धित कार्यालयको करिब दुई करोड रुपियाँ लगानीमा भवन निर्माण सम्पन्न भएको हो। नयाँ भवनबाट सेवा सञ्चालनमा आएको कार्यालयका शाखा अधिकृत कमलप्रसाद भट्टराईले जानकारी दिनुभयो। यसअघि भाडाको भवनमा सञ्चालन हुँदै आएको कार्यालय अब आफ्नै संरचनामा सरेको छ। कार्यालय सञ्चालनसँगै जिल्लाको पश्चिमी क्षेत्रमा रहेका देउमाई नगरपालिका, माङ्गसेबुङ्ग गाउँपालिका र फाकफोकथुम गाउँपालिकाका सेवाग्राहीले प्रत्यक्ष लाभ लिने अपेक्षा गरिएको छ। कार्यालयबाट नागरिकता वितरण, राष्ट्रिय परिचयपत्रका लागि फोटो खिचाउनेलगायतका सेवाहरू प्रदान हुँदै आएका छन्।
