काठमाडौं । उदयपुरका दुवै निर्वाचन क्षेत्रको प्रत्यक्षतर्फको मतगणना सम्पन्न भएको छ। मुख्य निर्वाचन अधिकृत मुकेश उपाध्यायका अनुसार क्षेत्र नं. १ मा राष्ट्रिय स्वतन्त्र पार्टी (रास्वपा) का उम्मेदवार पारसमणि गेलाल ३० हजार ५९० मत प्राप्त गरी विजयी हुनुभएको छ।
उहाँका निकटतम प्रतिद्वन्द्वी श्रम संस्कृति पार्टीका राजेशकुमार राईले ११ हजार ६०६ मत प्राप्त गर्नुभएको छ। उदयपुर क्षेत्र नं. १ मा जम्मा १ लाख ४२ हजार ९१६ मतदाता रहेकामा ७९ हजार ४६३ मत खसेको थियो। जसमध्ये ५ हजार ५०० मत बदर भएको मुख्य निर्वाचन अधिकृत उपाध्यायले जानकारी दिनुभयो।
यस परिणामसँगै उदयपुरका दुवै निर्वाचन क्षेत्रमा राष्ट्रिय स्वतन्त्र पार्टीका उम्मेदवारहरू प्रतिनिधिसभा सदस्य पदमा विजयी हुनुभएको छ। क्षेत्र नं. २ मा रास्वपाकै सूर्यबहादुर तामाङ १४ हजार ८०२ मत प्राप्त गरी विजयी हुनुभएको छ। उहाँका निकटतम प्रतिद्वन्द्वी नेकपा (एमाले) का अम्बरबहादुर रायमाझीले ७ हजार ६४८ मत प्राप्त गर्नुभएको छ। गोरखापत्र
