काठमाडौं । कपिलवस्तुमा बिहीबार देखि सुरु हुने माध्यमिक शिक्षा परीक्षा (एसइई) को सबै तयारी पुरा भएको छ । केन्द्राध्यक्ष केन्द्रमा खटी सकेका छन भने प्रश्न पत्र र उत्तर पुस्तिका सम्बन्धित स्थापना पुगी सकेको छ ।शिक्षा विकास तथा समन्वय इकाईका निमित्त प्रमुख चोपलाल बेल्बासेले एसईइको सबै तयारी पुरा भएको बताउनुभयो । उत्तर पुस्तिका सम्बन्धित केन्द्रमा पुगी सकेको छ । प्रश्न पत्र भने जिल्लामा रहेको जिल्ला प्रहरी र इलाका प्रहरी कार्यालयमा पठाई सकिएको छ । जिल्लामा ३५ वटा परीक्षा केन्द्र कायम गरिएको छ । सदरमुकाम तौलिहवामा ६ र सदरमुकाम बाहिर २९ वटा केन्द्र छन् । जिल्ला परीक्षा समन्वय समिति र केन्द्राध्यक्षको अभिमुखीकरण सम्पन्न भइ सकेका छ । जिल्लामा १७१ विद्यालयका नौ हजार ८८२ जना परीक्षामा सहभागी हुनेछन् । जसमध्ये नियमित तर्फ आठ हजार ४३२ विद्यार्थी परीक्षामा सहभागि हुँदै छन् । यस्तै ग्रेडवृद्धी तर्फ एक हजार ४५० जना परीक्षार्थी छन् । परीक्षा सुरक्षित निष्पक्ष र मर्यादितरुपमा सम्पन्न गर्न केन्द्रमा सुरक्षाकर्मी समेत परिचालन गरिने जिल्ला परीक्षा समन्वय समितिका अध्यक्ष तथा प्रजिअ जर्नादन गौतमले बताउनुभयो ।
सामुदायिक १३४ र संस्थागत ३७ विद्यालयका परीक्षार्थी सहभागी हुनेछन् ।परीक्षामा ३५ केन्द्राध्यक्ष, ७० सहायक केन्द्राध्यक्ष, पाँच सय निरीक्षक लागतका गरी साढे सात सय जनशक्ति परिचालन हुनेछन् । बिहीबार अङ्ग्रेजी विषयको परीक्षा हुनेछ ।
मोबाइल निषेध
परीक्षामा मोबाइल निषेध गरिएको छ । परीक्षामा मोबाइल सहीत डिजीटल सामाग्री लैजान निषेध गरिएको शिक्षा बिकास तथा समन्वय ईकाईका निमित्त प्रमुख चोपलाल बेल्बासेले बताउनुभयो । यस्तै चिट, गेस पेपर, गाईड लगायतका सामाग्री समेत लौजन पाईने छैन ।परीक्षालाई मर्यादीत बनाउन परीक्षा केन्द्रको गेट मै महिला र पुरुष निरीक्षकले खानतलासी लिन सक्ने बेल्बासेको भनाइ छ । गोरखापत्र
