काठमाडौं । सरकारले हुलाक सेवालाई प्रविधिमैत्री बनाउँदै ‘स्मार्ट हुलाक’ कार्यक्रम प्रभावकारी रूपमा अघि बढाएको छ। पहिलो चरणमा देशभरका ५० हुलाक कार्यालयलाई स्मार्ट हुलाकमा रूपान्तरण गर्ने तयारी भइरहेको हुलाक विभागले जनाएको छ।
स्मार्ट हुलाकमार्फत राहदानी, सवारी चालक अनुमतिपत्र, शैक्षिक प्रमाणपत्र र स्वास्थ्य परीक्षण प्रतिवेदनजस्ता सरकारी कागजात घरमै पुर्याउने सेवा विस्तार गरिएको छ। विभागका अनुसार हालसम्म दुई लाख ३७ हजारभन्दा बढी राहदानी र आठ लाख ८१ हजारभन्दा बढी सवारी चालक अनुमतिपत्र सम्बन्धित कार्यालयसम्म ढुवानी गरिएको छ भने हजारौं सेवाग्राहीले घरमै सेवा पाइसकेका छन्।
सरकारले हुलाकलाई परम्परागत पत्र वितरणमा सीमित नराखी डिजिटल र बहुउद्देश्यीय सार्वजनिक सेवा केन्द्रका रूपमा विकास गर्ने लक्ष्यसहित देशभर ‘स्मार्ट हुलाक’ कार्यक्रम चरणबद्ध रूपमा विस्तार गर्ने जनाएको छ।
