काठमाडौँ । नेपाली कांग्रेसको नयाँ नेतृत्व चयनका लागि महामन्त्री पदमा ११ जनाले उम्मेदवारी दर्ता गराएका छन्। कांग्रेसको १५औँ महाधिवेशनअन्तर्गत मंगलबार भएको मनोनयन दर्तामा खुलातर्फ प्रदीप पौडेल, गुरुराज घिमिरे, उदयशमशेर राणा, अमरसिंह पुन, नैनसिंह महर, शंकर तिवारी, डा. सुनील शर्मा र डा. सन्तोष उपाध्यायले उम्मेदवारी दिएका छन्।
यस्तै, महिलातर्फ डा. डिला संग्रौला, डिना उपाध्याय र रीता खनालले महामन्त्री पदमा उम्मेदवारी दर्ता गराएका छन्। कांग्रेसको विधानअनुसार महामन्त्री पदमा खुलातर्फ दुई जना र महिलातर्फ एक जना निर्वाचित हुने व्यवस्था छ। त्यसअनुसार ११ उम्मेदवारमध्ये तीन जना महामन्त्रीमा निर्वाचित हुनेछन्।
महामन्त्री पदका लागि मनोनयन दर्ता मंगलबार दिउँसो १२ बजेदेखि साँझसम्म चलेको थियो। कांग्रेसको नयाँ नेतृत्व चयनका लागि बिहीबार मतदान हुने निर्वाचन कार्यतालिका रहेको छ।
