काठमाडौं । सुदूरपश्चिम प्रदेशको ‘लाइफ लाइन’ मानिने चिसापानीस्थित कर्णाली पुलमा आगलागी भएपछि आवागमन बन्द गरिएको छ । सोमबार भएको आगलागीबाट पुलमा क्षति पुगेपछि आवागमन बन्द गरिएको हो ।
पुलमा गुडिरहेको ट्रकमा एक्कासि आगो दन्केर पुलमा पनि सल्किएको प्रतयक्षदर्शीले बताएका हुन् । पूर्वपश्चिम राजमार्ग रहेको सो पुलको लट्ठामा क्षति पुगेपछि सवारीसाधनलाई वैकल्पिक बाटो प्रयोग गर्न आग्रह गरिएको छ । जिल्ला प्रशासन कार्यालय कैलालीका सूचना अधिकारी शिवराज जोशीले आगलागीका कारण पुलमा जोखिम बढ्ने सम्भावना भएकाले वैकल्पिक बाटो प्रयोग गर्न आग्रह गरिएको बताउनुभयो । लम्की, टीकापुर, सत्ती पुल हुँदै बर्दियाको राजापुर हुलाकी राजमार्ग प्रयोग गरी सवारीसाधनको आवतजावत भइरहेको जानकारी उहाँले दिनुभयो । पुलमा आवागमन बन्द गरिएपछि वैकल्पिक बाटो भएर सवारीसाधन गन्तव्यतर्फ गइरहेका छन् । वीरगन्जबाट लाइटर बोकेर कञ्चनपुरका लागि आउँदै गरेको ना ५ ख ५२९७ नम्बरको ट्रकमा एक्कासि आगलागी भएको थियो । लाइटर एक आपसमा ठोक्किएर पड्किएपछि ट्रकमा आगो लागेको हुन सक्ने बताइएको छ । आगलागीबाट पुलमा गम्भीर क्षति भएको लम्कीचुहा नगरपालिका–४, वडाध्यक्ष ताराप्रसाद अधिकारीले बताउनुभयो ।
उहाँका अनुसार पुलको दक्षिणतर्फको भागसहित पुललाई अड्याउन मद्दत गर्ने फलामे लट्ठा (तार) सल्यापमा क्षति पुगेको छ । पुलमा धेरै क्षति भएका कारण प्राविधिक टोलीले सबैकुराको अध्ययन नगरेसम्म आवतजावत गर्न नहुने अधिकारीले उल्लेख गर्नुभयो । सो पुलमा भएको क्षति तथा सवारी आवागमन सञ्चालन गर्न मिल्ने वा नमिल्ने सम्बन्धमा अध्ययन गर्न काठमाडौँबाट पुलसम्बन्धी प्राविधिक टोली कैलाली पुग्ने जनाइएको छ । सन् १९९३ मा बनेको यो पुल एक खम्बामा लट्ठाहरूको मद्दतले अडिएको छ । कर्णाली पुल बनेपछि मात्रै सुदूरपश्चिम प्रदेश कर्णाली नदीभन्दा पूर्व रहेको नेपालको भूभागसँग जोडिएको थियो । यस्ता आकर्षक र विशाल पुल बनेपछि हरेक वर्ष मर्मत गर्नुपर्ने हुन्छ ।
तर यो पुल भने उद्घाटन भएको करिब ३१ वर्षसम्म पनि मर्मत नभएको वडाध्यक्ष अधिकारीले बताउनुभयो । “यो पुलको अहिलेसम्म एउटा नटबोल्ट बाँध्ने कार्य पनि भएको छैन,” उहाँले गुनासो गर्नुभयो । पछिल्लो समय हुलाकी सडक अन्तर्गत कर्णाली नदीमा सत्ती पुल पनि बनेकाले कर्णाली पुल बन्द भएको बेला वैकल्पिक बाटो प्रयोग गर्न सम्भव भएको भनाइ स्थानीयवासीको छ । आगो लागेर ट्रक र त्यसमा रहेको लाखौँ रुपियाँ बराबरको लाइटर जलेर नष्ट भएको जनाइएको छ । यसैबिच कर्णाली पुलमा आगलागीबाट भएको क्षतिको मङ्गलबार सुदूरपश्चिम प्रदेशका मुख्यमन्त्री कमलबहादुर शाह र कैलालीका प्रमुख जिल्ला अधिकारी धर्मेन्द्रकुमार मिश्रले स्थलगत निरीक्षण गर्नुभएको छ । पुलमा भएको क्षतिको विवरण सङ्कलनका लागि काठमाडौँ (केन्द्र) बाट प्राविधिकहरूको टोली बोलाइएको जानकारी उहाँहरूले दिनुभएको हो ।