काठमाडौं । मकवानपुर मनहरी गाउँपालिका ८ सिमपानीस्थित मोरङ्गे खोल्सोले बगाएर विद्यालयबाट फर्कदै गरेको एक बालिकाको मृत्यु भएको छ । मनहरी गाउँपालिका ८ सिमपानी गुरुङडाँडाकी रितिका भन्ने रन्जिता गुरुङको मङ्गलबार साँझ खोल्सोले बगाएर मृत्यु भएको जिल्ला प्रहरी कार्यालय मकवानपुरका प्रहरी नायब उपरीक्षक लक्ष्मी भण्डारीले जानकारी दिनुभयो ।
स्थानीय युनाइटेड बोर्डिङ स्कुलमा अध्यनरत वर्ष १४ की रन्जिता र महेन्द्रकिरण माविमा अध्ययनरत वर्ष १७ का छात्र दुवै जना घर फर्कने क्रममा घरदेखि करिब २० मिटर नजिकै पश्चिमतर्फ रहेको मोरङ्गे खोल्सो तर्ने क्रममा वर्षापछि आएको बाढीले बगाएको थियो । खेल्सोमा आएको बाढीले बगाएर रन्जितालाई बेपत्ता बनाएको र घाइते भएका १७ वर्षीय छात्रको उद्धारपछि मनहरी अस्पतालमा उपचार भएको र अवस्था सामान्य रहेको प्रहरीले जनाएको छ । जिल्ला प्रहरी कार्यालय मकवानपुरका अनुसार खोल्सोले बगाएर बेपत्ता भएका रन्जितालाई इलाका प्रहरी कार्यालयको प्रहरी टोलीले खोजतलास गर्ने क्रममा बगाएको स्थानबाट करिब दुई किमि तल जनसेवा क्रसर नजिकै मृत अवस्थामा फेला पारेको र शव परीक्षणका लागि हेटौँडा अस्पतालमा ल्याइएको छ । गोरखापत्र
