काठमाडौं, कात्तिक १ — नेपाल कम्युनिस्ट पार्टी (माओवादी केन्द्र) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले जुनसुकै आन्दोलन वा क्रान्तिमा ‘मित्र शक्ति’ र ‘दुश्मन शक्ति’ छुट्याउन नसके, बलिदानबाट प्राप्त उपलब्धि संस्थागत हुन नसक्ने चेतावनी दिनुभएको छ।
पेरिसडाँडास्थित पार्टी केन्द्रीय कार्यालयमा अखिल नेपाल ट्रेड युनियन महासंघद्वारा आयोजित शुभ दीपावली, नेपाल संवत् र छठ पर्वको चियापान तथा शुभकामना आदान–प्रदान कार्यक्रममा बोल्दै प्रचण्डले विशेषगरी Gen Z आन्दोलनमा सक्रिय युवाहरूसँग आग्रह गर्दै भन्नुभयो, “तपाईंहरू आफ्नो मित्र को हो, शत्रु को हो भन्ने छुट्याउनुहोस्। हामीलाई पनि पहिले आतंककारी भनिएको थियो।”
‘हामीलाई पनि आन्दोलनका बेला आतंककारी भनिएको थियो’
संयोजक प्रचण्डले जनताको हक, अधिकार र न्यायका लागि लड्नेहरूमाथि ‘आतंककारी’को आरोप लगाउने प्रवृत्ति नयाँ नभएको बताउँदै भन्नुभयो, “जब उत्पीडित वर्ग, समुदाय, जाति वा लिङ्गका लागि आवाज उठाइन्छ, तब सत्ताले त्यसलाई आतंकको संज्ञा दिन खोज्छ — हामीले पनि भोगेका छौं, आज तपाईंहरू पनि भोग्दै हुनुहुन्छ।”
उहाँले थप स्पष्ट पार्नुभयो, “क्रान्तिमा सबैभन्दा जरुरी कुरा भनेको हो — साथ दिने र सच्चा मित्रको पहिचान गर्नु। दुश्मनलाई साथी ठानेर अघि बढ्दा क्रान्ति नै भ्रममा पर्न सक्छ।”
निर्वाचनलाई राष्ट्रको साझा परियोजनाका रूपमा लिन प्रचण्डको आग्रह
देश अहिले राजनीतिक रूपले संवेदनशील र जटिल मोडमा रहेको उल्लेख गर्दै प्रचण्डले सबै राष्ट्रवादी, लोकतान्त्रिक र क्रान्तिकारी शक्तिहरू एक ठाउँमा उभिनुपर्ने आवश्यकता औंल्याउनुभयो।
उहाँले भन्नुभयो, “संविधान र लोकतन्त्रको रक्षा गर्ने सबैभन्दा व्यवस्थित, समावेशी र राष्ट्रहितको विकल्प भनेकै माघ २१ गतेको निर्वाचन हो। यसलाई सफल बनाउन सबै राजनीतिक दल, नागरिक समाज, बुद्धिजीवी, पत्रकार सबैको ऐक्यबद्धता आवश्यक छ।”
