बागलुङ – गलकोट नगर अस्पतालले महिला सामुदायिक स्वास्थ्य स्वयंसेविकाका रूपमा २८ वर्षसम्म समुदायको स्वास्थ्य सेवामा योगदान पुर्याउनुभएकी डम्मरकुमारी जैसीलाई सम्मानसहित भावपूर्ण बिदाइ गरेको छ। विसं २०५५ देखि २०८३ सालसम्म निरन्तर सेवा पुर्याउनुभएकी जैसीलाई अस्पतालले उहाँको योगदानको कदर गर्दै बिदाइ गरेको हो।
२७ वर्षकै उमेरमा एकल महिला बन्नुभएकी जैसीले व्यक्तिगत पीडा, पारिवारिक जिम्मेवारी र सामाजिक चुनौतीका बीच पनि समाजसेवाको बाटो रोज्नुभयो। जीवनका कठिन परिस्थितिलाई सामना गर्दै उहाँले महिला, बालबालिका, ज्येष्ठ नागरिक तथा विपन्न परिवारको स्वास्थ्य र जनचेतनाका क्षेत्रमा उल्लेखनीय योगदान पुर्याउनुभएको छ।
स्वयंसेविकाका रूपमा जैसीले घरदैलोमा पुगेर स्वास्थ्यसम्बन्धी जानकारी दिने, गर्भवती तथा सुत्केरी महिलालाई आवश्यक परामर्श प्रदान गर्ने, बालबालिकाको स्वास्थ्य तथा पोषणबारे सचेतना फैलाउने र खोप तथा सरसफाइ अभियानमा सहजीकरण गर्ने काम गर्नुभयो। समुदायका नागरिकलाई स्वास्थ्य संस्थासँग जोड्न उहाँले निर्वाह गर्नुभएको भूमिकाले धेरै परिवारलाई समयमै स्वास्थ्य सेवा लिन प्रेरित गरेको अस्पतालले जनाएको छ।
महिला सामुदायिक स्वास्थ्य स्वयंसेविकाहरू समुदाय र स्वास्थ्य संस्थाबीचको महत्वपूर्ण सेतुका रूपमा रहेका छन्। सीमित स्रोतसाधन र विभिन्न चुनौतीका बाबजुद घरदैलोमै पुगेर स्वास्थ्य सेवा, सूचना तथा जनचेतना प्रवाह गर्दै आएका स्वयंसेविकामध्ये जैसीको लामो सेवायात्रा समर्पण र सेवाभावको उदाहरण बनेको छ।
गलकोट नगर अस्पतालले जैसीको निष्ठा, सक्रियता र निरन्तर सेवाभावको उच्च प्रशंसा गर्दै उहाँले समुदायलाई स्वस्थ, सचेत र जिम्मेवार बनाउन पुर्याउनुभएको योगदान सधैँ स्मरणीय रहने जनाएको छ। बिदाइ कार्यक्रममा उहाँको २८ वर्षे सेवायात्राको प्रशंसा गर्दै आगामी जीवन सुखद, स्वस्थ, शान्तिपूर्ण र दीर्घायु रहोस् भन्ने शुभकामना व्यक्त गरिएको थियो। औपचारिक सेवाबाट बिदा भए पनि उहाँको अनुभव र सेवाभावले आगामी पुस्ताका स्वास्थ्य स्वयंसेविकालाई प्रेरणा दिने विश्वास व्यक्त गरिएको छ।
गलकोट नगर अस्पतालका प्रमुख डा. राजेश पौडेलले जैसीको जीवनले कठिन परिस्थितिमा पनि दृढ इच्छाशक्ति, जिम्मेवारीबोध र सेवाभावका साथ अघि बढे समाजमा सकारात्मक परिवर्तन सम्भव हुने सन्देश दिएको बताउनुभयो। उहाँको योगदान गलकोटको स्वास्थ्य क्षेत्र र समुदायको सामाजिक इतिहासमा सम्मानपूर्वक स्मरणीय रहने डा. पौडेलले उल्लेख गर्नुभयो।
