काठमाडौं, कात्तिक ५
रौतहटको चन्द्रपुर नगरपालिका–४, पश्चिम लच्का नजिक बुधबार बिहान एक यात्रुवाहक बसमा अचानक आगलागी भएको छ।
काठमाडौँबाट चन्द्रपुरतर्फ आउँदै गरेको प्रदेश २–०३–००१ ख ५५५५ नम्बरको बसमा ब्याट्रीको तार सर्ट भई आगलागी भएको इलाका प्रहरी कार्यालय चन्द्रनिगाहपुरले जनाएको छ।
बिहान ७ः२० बजे सुरु भएको आगो करिब ८ः१५ बजे नियन्त्रणमा लिइएको प्रहरी नायब उपरीक्षक रुपा लाबुंगले जानकारी दिनुभयो।
नेपाल प्रहरी, सशस्त्र प्रहरी र ट्राफिक प्रहरीको संयुक्त प्रयासमा बारुण यन्त्रको सहयोगले आगो नियन्त्रणमा लिइएको हो।
घटनामा कुनै मानवीय क्षति नभएको बताउँदै डिएसपी लाबुंगले बस भने पूर्ण रूपमा जलेर नष्ट भएको जानकारी दिनुभयो।
प्रहरीले घटनाको थप अनुसन्धान अघि बढाएको छ।
