काठमाडौं । झापाको शिवसताक्षी नगरपालिका–७ लालपानीमा सर्पदंशबाट एक बालकको मृत्यु भएको छ। शुक्रबार अपराह्न घरनजिकै खेलिरहेको बेला ५ वर्षीय सक्षम तामाङलाई विषालु गोमन सर्पले टोकेको जिल्ला प्रहरी कार्यालय झापाले जनाएको छ। मृतक सोही स्थानका मनकुमार तामाङका छोरा हुन्।
सक्षमलाई दायाँ खुट्टामा सर्पले टोकेपछि तत्काल उपचारका लागि आफन्तहरूले बिर्ता सिटी अस्पताल लगेका थिए। बेहोस अवस्थामा अस्पताल पुगेका उनलाई प्राथमिक उपचारपछि थप उपचारका लागि नेपाली सेनाको सर्पदंश उपचार केन्द्र चारआली लैजाने क्रममा बेलुका नै उनको मृत्यु भएको हो।
घटनापछि आसपास क्षेत्रको खोजतलास गर्दा गोमन सर्प फेला परेको प्रहरीले जनाएको छ। प्रहरीका अनुसार घटनाबारे थप अनुसन्धान जारी रहेको छ।
