काठमाडौं । नेपाली बजारमा मङ्गलबार पनि सुनको मूल्यमा गिरावट आएको छ। अघिल्लो दिनको तुलनामा आज प्रतितोला २ हजार ९ सय रुपैयाँले मूल्य घटेको हो।
नेपाल सुनचाँदी व्यवसायी महासंघका अनुसार आज सुन प्रतितोला २ लाख ३७ हजार रुपैयाँमा कारोबार भइरहेको छ। सोमबार भने यसको मूल्य २ लाख ३९ हजार ९ सय रुपैयाँ थियो।
यसैगरी, चाँदीको मूल्य पनि घटेको छ। महासंघका अनुसार आज चाँदी प्रतितोला ६० रुपैयाँले घटेर २९२० रुपैयाँमा कारोबार भइरहेको छ। अघिल्लो दिन प्रतितोला २९८० रुपैयाँमा कारोबार भएको थियो।
अन्तर्राष्ट्रिय बजारमा सुनचाँदीको मूल्यमा आएको गिरावटसँगै यसको असर नेपाली बजारमा पनि देखिएको महासंघले जनाएको छ। तिहारपछि मात्रै सुनको मूल्य प्रतितोला १६ हजार ५ सय रुपैयाँले घटिसकेको छ।
असोज ३१ गते सुनको मूल्य हालसम्मकै उच्च बिन्दु २ लाख ५८ हजार रुपैयाँ पुगेको रेकर्ड छ। सोही दिन चाँदीको मूल्य पनि प्रतितोला ३३५० रुपैयाँ पुगेको थियो।
