काठमाडौँ — प्रधानमन्त्री सुशीला कार्कीले सरकार, विघटित प्रतिनिधि सभामा प्रतिनिधित्व गर्ने राजनीतिक दलहरू तथा जेनजीका प्रतिनिधिबीच त्रिपक्षीय संवाद आह्वान गर्नुभएको छ । भदौ २३ र २४ गतेको जेनजी विद्रोहपछि गठित सरकारले पहिलोपटक यस्तो संवाद सुरु गर्न लागेको हो ।
प्रधानमन्त्री कार्कीले आसन्न निर्वाचनका लागि आवश्यक वातावरण बनाउन राजनीतिक दल र सम्बद्ध पक्षहरूसँग निरन्तर वार्ता र छलफल गरिरहनुभएको छ । सोही क्रममा उहाँको आह्वानमा आज (बुधबार) अपराह्न ४ बजे प्रधानमन्त्री निवास बालुवाटारमा सरकार, राजनीतिक दल र जेनजीका प्रतिनिधिबीच निर्वाचनकेन्द्रित संयुक्त बैठक बस्नेछ ।
सञ्चार तथा सूचना प्रविधिमन्त्री जगदीश खरेलका अनुसार आगामी निर्वाचनलाई सफल र निष्पक्ष बनाउन पहिलो पटक त्रिपक्षीय संवाद आयोजना गरिएको हो । उहाँले निर्वाचन तयारीका लागि राजनीतिक दल र अन्य सरोकारवाला पक्षहरूसँग चरणबद्ध छलफल भइरहेको जानकारी दिनुभयो ।
यसअघि कात्तिक ४ गते प्रधानमन्त्री कार्कीले नेपाली कांग्रेस, नेकपा (एमाले), नेकपा (माओवादी केन्द्र) लगायत विघटित संसद्मा प्रतिनिधित्व गर्ने दलका शीर्ष नेतासँग पनि संवाद गर्नुभएको थियो । उक्त बैठकमा दलहरूले निर्धारित समयमा निर्वाचन सम्पन्न गर्न सरकारलाई आवश्यक तयारी तीव्र बनाउन आग्रह गरेका थिए ।
प्रधानमन्त्री कार्कीले जेनजीका प्रतिनिधिसहित विभिन्न पक्षसँग पनि निरन्तर सम्पर्क राख्दै निर्वाचन तयारीका काम अघि बढाइरहनुभएको छ । सरकारले निर्वाचन आयोगसँग प्राविधिक र व्यवस्थापकीय तयारीबारे छलफल गरी गृहकार्य अघि बढाइसकेको छ भने आयोगले पनि आफ्नो क्षेत्राधिकारभित्रका तयारी कार्य सुरु गरेको जनाएको छ ।
