काठमाडौं । कोशी प्रदेशका मुख्यमन्त्री हिक्मतकुमार कार्कीले किरात धर्मका महागुरु फाल्गुनन्द लिङदेनको १४०औं जन्मजयन्तीका अवसरमा महागुरुका सत्य, अहिंसा र नारी सम्मानका शिक्षालाई प्रदेश सरकारको नीति र व्यवहारमा रूपान्तरण गर्ने प्रतिबद्धता जनाउनुभएको छ। महागुरु फाल्गुनन्दप्रति श्रद्धाञ्जलि अर्पण गर्दै मुख्यमन्त्री कार्कीले भन्नुभयो, “महागुरुको जीवनशैलीले सहिष्णुता, एकता र सद्भावको बाटो देखाएको छ। अब ती मूल्यलाई प्रदेश सरकारका नीति, कार्यक्रम र कार्यान्वयनमा समावेश गर्नु हाम्रो लक्ष्य हो।”
उहाँका अनुसार फाल्गुनन्दले प्रचार गरेको ‘सत्य बोल्ने, अहिंसा अपनाउने र नारीको सम्मान गर्ने’ सन्देश आजको परिवेशमा झन् सान्दर्भिक बनेको छ। “बाल्यकालदेखि समाज सुधारमा समर्पित महागुरुको जीवन नेपाली समाजका लागि स्थायी प्रेरणा बनेको छ,” उहाँले थप्नुभयो।
मुख्यमन्त्री कार्कीले कोशी प्रदेश सरकार सबै जात, भाषा र संस्कृतिको संरक्षणमा प्रतिबद्ध रहेको जनाउँदै भने, “संविधानअनुसार प्रदेशका मातृभाषालाई सरकारी प्रयोजनमा प्रयोगमा ल्याउने तयारी भइरहेको छ। भाषा र संस्कृति राज्यको पहिचान हुन्, त्यसको संरक्षण हाम्रो दायित्व हो।” महागुरु फाल्गुनन्दको शिक्षाबाट प्रेरणा लिएर शान्त, समृद्ध र सहिष्णु समाज निर्माणमा सबै नागरिकले योगदान पुर्याउनुपर्नेमा उहाँले जोड दिनुभयो।
