काठमाडौं । निर्वाचन आयोगले आफ्नो वेबसाइटमा अनधिकृत व्यक्तिको पहुँचमा मतदाता नामावलीसम्बन्धी कुनै संवेदनशील सूचना नरहेको स्पष्ट पारेको छ। आयोगले विज्ञप्ति जारी गर्दै केही सञ्चारमाध्यम र सामाजिक सञ्जालमा सूचना प्रणाली ह्याक गरी गोप्य विवरण फेला पारेको भनिएका दाबीहरू प्रति गम्भीर ध्यानाकर्षण भएको जनाएको हो।
प्रवक्ता नारायणप्रसाद भट्टराईद्वारा जारी विज्ञप्तिमा आयोगले नागरिकका कानुनबमोजिम गोप्य राखिनुपर्ने सूचनाको सुरक्षामा पूर्ण प्रतिबद्धता व्यक्त गरेको छ। उनका अनुसार सूचना प्रविधि विज्ञहरूले प्रणालीको निरन्तर अनुगमन, सुरक्षालाई जोखिम विश्लेषण तथा आवश्यक उपायहरूको कार्यान्वयन निरन्तर गर्दै आएका छन्।
आयोगका अनुसार सामाजिक सञ्जालमा ‘आयोगको डेटाबेसबाट निकालिएको’ भन्दै देखाइिएका पीडीएफ फाइलहरू वास्तवमा विगतमा निर्वाचन प्रयोजनका लागि कानुनी रुपमा कार्यालयहरू र राजनीतिक दलहरूलाई उपलब्ध गराइएका सामान्य जानकारी मात्र हुन्। ती फाइलहरूमा नागरिकका संवेदनशील वा गोप्य विवरण समावेश नरहेको आयोगले स्पष्ट पारेको छ। यसबारे विभिन्न माध्यममा अप्रमाणित, भ्रामक तथा मिथ्या सामग्री प्रसारित भइरहेको भन्दै आयोगले सबैलाई त्यस्ता दाबीहरूमा विश्वास नगर्न आग्रह गरेको छ।
