काठमाडौं । काठमाडौं महानगरपालिकाका प्रमुख बालेन्द्र साह पितृशोकमा परेका छन्। उनका पिता तथा आयुर्वेदिक चिकित्सक डा. रामनारायण साहको आज बिहान नयाँ बानेश्वरस्थित सिभिल अस्पतालमा उपचारका क्रममा निधन भएको अस्पतालका निर्देशक मोहनचन्द्र रेग्मीले जानकारी दिए।
उनका अनुसार आइतबार बिहानदेखि डा. साहलाई भेन्टिलेटरमा राखी उपचार भइरहेको थियो। पिसाबमा संक्रमण देखिएपछि त्यसले शरीरभरि फैलिँदै जटिल अवस्था सिर्जना गरेकाले उपचार प्रभावकारी हुन नसकेर निधन भएको रेग्मीले बताए। डा. साह मधुमेहका बिरामी समेत रहेको चिकित्सकले जानकारी दिए।
