काठमाडौं । आगामी फागुन २१ गते हुने प्रतिनिधिसभा निर्वाचन नजिकिँदै जाँदा कोशी प्रदेशमा सुरक्षा चुनौतीबारे समीक्षा भएको छ । विराटनगरमा आयोजित प्रदेशस्तरीय सुरक्षा गोष्ठीले निर्वाचनलाई शान्तिपूर्ण, निष्पक्ष र भयरहित बनाउने विषयलाई केन्द्रमा राखेर सुरक्षा निकायबिच साझा बुझाइ र रणनीति तय गर्ने प्रयास गरेको हो । प्रदेशका १४ वटै जिल्लाको शान्ति–सुरक्षाको अवस्था, भौगोलिक चुनौती, सीमा क्षेत्रको संवेदनशीलता र निर्वाचनका समयमा देखिन सक्ने जोखिमबारे समग्र छलफल भएको थियो । गृह मन्त्रालयका प्रवक्ता तथा सहसचिव आनन्द काफ्लेका अनुसार गोष्ठी पूर्ण रूपमा निर्वाचन लक्षित भए पनि यसले दीर्घकालीन सुरक्षा व्यवस्थापनका पक्षहरूलाई समेत छोएको छ ।
गोष्ठीको छलफलबाट जेलबाट फरार रहेका कैदीबन्दी र विगतमा प्रहरीबाट लुटिएका हतियारहरू अझै पनि सुरक्षा चुनौतीका रूपमा रहेको निष्कर्ष निस्किएको छ । जिल्ला प्रशासन र सुरक्षा निकायहरूले हालसम्म गरेका प्रयास, सामना गरेका समस्या र अपनाइएका असल अभ्यासबारे पनि गोष्ठीमा समीक्षा गरिएको थियो । गोष्ठीमा मुख्यमन्त्री हिक्मतकुमार कार्की र आन्तरिक मामिला तथा कानुनमन्त्री रेवतीरमण भण्डारीले पछिल्लो सुरक्षा अवस्थाप्रति चासो व्यक्त गर्दै फरार कैदीबन्दीको सङ्ख्या र लुटिएका हतियार अझै बरामद नभएको अवस्थाले सुरक्षा चुनौती कायम रहेको बताउनुभएको छ ।
भौगोलिक रूपमा विकट जिल्लाहरूमा निर्वाचन व्यवस्थापनका लागि हेलिकप्टर आवश्यक पर्न सक्ने विषय पनि उठाइएको छ । मौसम र परिस्थितिको मूल्याङ्कन गर्दै आवश्यक परेमा हेलिकोप्टर व्यवस्थापन गरिने गृह मन्त्रालयले जनाएको छ । गृह मन्त्रालय र कोशी प्रदेश सरकारअन्तर्गत आन्तरिक मामिला तथा कानुन मन्त्रालयको संयुक्त आयोजनामा गोष्ठी सम्पन्न भएको हो । सुरक्षा गोष्ठीले निर्वाचनको सफलताका लागि सुरक्षा निकायबिच प्रभावकारी समन्वय, समयमै सूचना आदानप्रदान र साझा रणनीति अपरिहार्य हुने निष्कर्ष निकालेको छ । गोरखापत्र
