काठमाडौं । गण्डकी प्रदेश सभाको हिउँदे अधिवेशन अन्त्य भएको छ । नेपालको संविधानको धारा १८३ को उपधारा (२) बमोजिम मन्त्रिपरिषद्को सिफारिसमा प्रदेश प्रमुख डिल्लीराज भट्टले प्रदेश सभाको चालु अधिवेशन आइतबार राति १२ बजेदेखि लागु हुनेगरी अन्त्य गर्नुभएको हो । गण्डकी प्रदेश सभा सचिवालयले सूचना जारी गर्दै प्रदेश प्रमुखले मन्त्रिपरिषद्को सिफारिसमा अधिवेशन अन्त्य गरेको जानकारी दिएको छ । प्रदेश सरकारको सिफारिसमा प्रदेश प्रमुखले अधिवेशन आह्वान र अन्त्य गर्ने संवैधानिक प्रावधान छ ।
गण्डकी प्रदेश सभाको आठौं अधिवेशन यही चैत ८ गते सुरु भएको थियो । गण्डकी प्रदेशमा जनस्वास्थ्य सम्बन्धमा व्यवस्था गर्न बनेको विधेयक र गण्डकी प्रदेश सडक ऐन, २०८१ लाई संशोधन गर्न बनेको विधेयक हिउँदे अधिवेशनबाट पारित भएका छन् । प्रदेश सभा सचिवालयका शाखा अधिकृत शशिधर सुवेदीले अहिले समितिमा दुई विधेयक छलफलका क्रममा रहेको जानकारी दिनुभयो । औषधीजन्य तथा औद्योगिक प्रयोजनका लागि गाँजा खेतीलाई नियमन गर्ने सम्बन्धमा व्यवस्था गर्न बनेको विधेयक र गण्डकी प्रदेशमा प्रदेश खाद्य अधिकार तथा खाद्य गुणस्तर सम्बन्धमा व्यवस्था गर्न बनेको विधेयक प्रदेश सभाका समितिहरूमा छलफलका क्रममा छन् । गोरखापत्र
