काठमाडौं – उपहार मिडिया नेटवर्क प्रालि तथा उपहार खबर अनलाईन पत्रिकाका सञ्चालक तथा सम्पादक रामदत्त मिश्र नेपाल व्यापार संघको प्रेस सल्लाहकारमा पुनः नियुक्त भएका छन्। उहाँ यसअघि तत्कालीन अध्यक्ष हरि गौतमको कार्यकालदेखि करिब तीन वर्ष प्रेस सल्लाहकारका रूपमा कार्यरत थिए। गौतमको कार्यकाल सकिएसँगै वर्तमान अध्यक्ष गिरिराज पोखरेल नेतृत्वको कार्यसमितिले पनि मिश्रलाई प्रेस सल्लाहकारको जिम्मेवारी दिएको हो।
पुनः प्रेस सल्लाहकारको जिम्मेवारी पाएपछि मिश्रले नेपाल व्यापार संघको संस्थागत हित, विकास तथा प्रवर्द्धनका लागि आफूले जानेबुझेका विषयमा आवश्यक सहयोग, सल्लाह तथा सुझाव आगामी दिनमा पनि निरन्तर प्रदान गर्ने प्रतिबद्धता व्यक्त गरेका छन्।
मिश्रले सञ्चारमाध्यममार्फत संघका गतिविधि, व्यवसायीका समस्या तथा संस्थागत गतिविधिलाई प्रभावकारी रूपमा प्रवाह गर्न आफ्नो भूमिकालाई थप जिम्मेवार र प्रभावकारी बनाउने बताएका छन्।
