काठमाडौं । नेपाल भेटनरी सङ्घको आयोजनामा तेस्रो संस्करणको ‘राइट टु प्रोटिन’ दौड शनिबार हुने भएको छ । दौडमा सात हजार १९ जनाको सहभागिता रहने बिहीबार आयोजित पत्रकार सम्मेलनमा जानकारी दिईयो ।
त्रिपुरेश्वरस्थित दशरथ रङ्गशालाबाट सुरु हुने दौडको प्रधानमन्त्री पुष्पकमल दाहाल ‘प्रचण्ड’ले उद्घाटन गर्नुहुनेछ । दौड काठमाडौँका विभिन्न स्थानहुँदै पुनः रङ्गशालामा पुगेर सकिनेछ । प्रतियोगितामा हाफ म्याराथन खुला, पुरुष १० किमि, महिला पाँच किमि, कक्षा १२ सम्मका विद्यार्थी छात्रका लागि पाँच किमि र छात्राका लागि तीन किमि तथा ह्वीलचियर दौड समावेश गरिएको छ । प्रतियोगितामा कूल पुरस्कार राशी १४ लाख १२ हजार पाँच सय रुपियाँ रहेको र हाफ म्याराथनको विजेतालाई एकलाख ३३ हजार ३३३ रुपियाँ प्रदान गरिनेछ । यस्तै म्याराथनमा शीर्ष पाँचमा रहने खेलाडीलाई आकर्षक नगद पुरस्कारको ब्यवस्था गरिएको आयोजकले जनाएको छ ।
युनाइटेड स्टेट सोयाबिन एक्पोर्ट काउन्सिलले प्रायोजनमा गरेको प्रतियोगितालाई नेपाल दाना सङ्घ र पशु सेवा विभाग, राष्ट्रिय खेलकुद परिषद् (राखेप) लगायत संस्थाले सहयोग गरेको छ । प्रतियोगितालाई नेपाल एथलेटिक्स सङ्घको प्राविधिक सहयोगमा रहेको छ । अघिल्लो संस्करणको उपाधि पुरुषतर्फ दिनेश अधिकारी र महिलातर्फ फुलमती रानाले जित्नुभएको थियो ।