काठमाडौँ । भर्जिनियाको च्यान्टिलीस्थित एक होटेल बाहिर रहेको पोखरीमा डुबेर बिहीबार बिहान दुई जना नेपालीको दुःखद निधन भएको छ । मृतक दुवै जना कारभित्र सवार थिए ।
फेयरफ्याक्स काउन्टी प्रहरीले दिएको प्रारम्भिक जानकारी अनुसार, विन्डहम होटेल नजिकै ती दुई नेपाली चढेको कार हिउँका कारण चिप्लिँदै पोखरीमा खसेपछि दुवै जनाको निधन भएको हो । मृतकहरूमा बुटवल स्थायी घर भई भर्जिनियाको च्यान्टिली बस्ने ५५ वर्षीय कर्णबहादुर खड्का र काठमाडौँका २१ वर्षीय निश्चल भट्ट रहेको पारिवारिक स्रोतले जनाएको छ । भट्ट विद्यार्थी भिसामा छ महिना अघि मात्र अमेरिका आएका थिए । पारिवारिक स्रोतका अनुसार, खड्का र भट्ट मामा भान्जा हुन् ।
उनीहरूले चलाएको गाडी पोखरीभित्र खसेपछि उनीहरू निस्कन नसकेका कारण उनीहरूको निधन भएको प्रहरीको भनाइ छ । उनीहरू खसेको १० मिनेटभित्रै प्रहरीसहितको उद्धार टोली आएर सो गाडी पोखरीबाट निकाल्दासम्म उनीहरूको चिसोमा कठ्याङ्ग्रिएर मृत्यु भइसकेको प्रहरीले जनाएको छ । प्रहरीले यस बारे थप अनुसन्धान गरिरहेको छ ।
