काठमाडौँ । दक्षिणपश्चिम चीनको एउटा रमणीय स्थानमा तीव्र हावाले पर्यटक बोकेको डुङ्गा पल्टिएपछि नौ जनाको मृत्यु भएको र ७० जनालाई अस्पतालमा भर्ना गरिएको सरकारी सञ्चार माध्यमले सोमबार जनाएको छ । सरकारी प्रसारक सिसिटिभीका अनुसार यात्रुहरू बोकेका डुङ्गाहरू आइतबार दिउँसो गुइझोउ प्रान्तको किआनक्सी सहरको एक नदीमा पल्टिँदा ८४ जना पानीमा खसेका थिए । सोमबार बिहानसम्ममा नौ जनाको मृत्यु भएको, ७० जनालाई अस्पतालमा भर्ना गरिएको र चार जना सकुशल रहेको सरकारी सञ्चार माध्यमले जनाएको छ । एक जना बेपत्ता छन् । चिनियाँ राष्ट्रपति सी जिनपिङले घाइतेहरूको खोजी र उद्धार कार्य तथा उपचारमा ‘सबै प्रयास’ गर्न आग्रह गर्नुभएको सरकारी समाचार एजेन्सी सिन्ह्वाले जनाएको छ ।
सीले पर्यटक आकर्षणहरू र अन्य ठुला सार्वजनिक स्थलहरूमा सुरक्षा उपायहरू सुदृढ पार्ने महत्त्वलाई पनि जोड दिनुभएको एजेन्सीले बताएको छ । उपप्रधानमन्त्री झाङ गुओचिङलाई उद्दार कार्यको निरीक्षण गर्न घटनास्थलमा पठाइएको सरकारी राज्य सञ्चारमाध्यमले उल्लेख गरेको छ । अनुसन्धानले डुङ्गाहरूमा यात्रुहरूको अधिक सङ्ख्या नभएको पत्ता लगाएको सिसिटिभीले जनाएको छ । आइतबारको घटना मध्य चीनमा डुङ्गा ठोक्किएर ११ जनाको ज्यान गएको घटना भएको झण्डै दुई महिनापछि आएको हो । हुनान प्रान्तमा एउटा यात्रु डुङ्गा औद्योगिक जहाजमा ठोक्किएपछि १९ जना पानीमा खसेपछि दुर्घटना भएको थियो । रासस/एएफपी